سری نگر، 3 جولائی (سیاست ڈاٹ کام) صوبائی کمشنر کشمیر بصیر احمد خان اور کشمیر زون پولیس کے انسپکٹر جنرل سوئم پرکاش پانی نے سری نگر کے مضافاتی علاقہ بمنہ میں واقع حج ہائوس کا دورہ کرکے انتظامات کا جائزہ لیا۔ سرکاری ترجمان کے مطابق حج 2019 کے سلسلے میں عازمین کو بہتر سہولیات فراہم کرنے کے لئے صوبائی کمشنر کشمیر بصیر احمد خان نے حج ہائوزبمنہ کا دورہ کیا اور عازمین حج کے لئے بلا خلل سہولیات کو یقینی بنانے کے لئے کئے جارہے انتظامات کا جائزہ لیا۔ دورے کے دوران صوبائی کمشنر نے پورے حج ہائوزاور اس کے مختلف شعبوں کا معائنہ کیا۔ انہوں نے ایس ایم سی کو حج ہائوزاوراس کے گردونواح میں روزانہ بنیادوں پر صفائی ستھرائی کی طرف ٹھوس توجہ مبذول کرنے کی ہدایت دی۔ جبکہ آر اینڈ بی کو دو دنوں کے اندر اندر میکڈم بچھانے کا کام مکمل کرنے اور اس حوالے سے ترقیاتی کمشنر سری نگر کو رپورٹ پیش کرنے کے احکامات دئیے ۔ صوبائی کمشنر نے بجلی، پانی اور طبی سہولیات کی فراہمی کے لئے بھی متعلقہ افسران کو ہدایت دی تاکہ عازمین کو کسی بھی دقت کا سامنا نہ کرنا پڑے ۔ یہ امر قابل ذکر ہے کہ عازمین حج کا پہلا قافلہ 4 جولائی کو سفر محمود پر روانہ ہورہا ہے اور عازمین کی روانگی 29 جولائی تک جاری رہے گی۔ صوبائی کمشنر نے عازمین کو اڑان کے وقت کی روانگی سے 4 گھنٹے پہلے حج ہائوزبمنہ پہنچنے کی ہدایت دی ہے ۔ صوبائی کمشنر نے عازمین کی سہولیات کے لئے افسران کو قریبی تال میل کے ساتھ کام کرنے پر زور دیا۔ دریں اثنا آئی جی کشمیر ایس پی پانی نے حج ہاوس بمنہ کا دورہ کیا اور وہاں سفر محمود پر جانے والے عازمین کو بہم رکھی جانے والی سہولیات کا جائزہ لیا۔ انسپکٹر جنرل آف پولیس کے ہمراہ ڈی آئی جی سینٹرل کشمیر وی کے بردی، ایس ایس پی سری نگر ڈاکٹر حسیب مغل اورضلع کے دوسرے سینئر افسران بھی موجود رہے ۔ اس موقع پر سیکورٹی ، ٹریفک اور دوسرے محکموں سے وابستہ افسران نے اٹھائے جارہے اقدامات سے آئی جی کشمیر کو روشناس کیا۔ آئی جی کشمیر نے مختلف محکموں کے افسران کے درمیان قریبی تال میل پر زور دیتے ہوئے کہا کہ سفر محمود پر جانے والے عازمین کو تمام تر سہولیات بہم رکھیں جائیں تاکہ انہیں کسی قسم کی دقتوں کا سامنا کرنے پر مجبور نہ ہونا پڑے اور حاجی صاحبان خوشگوار طریقے سے بہ احسن خوبی اپنا سفر جاری رکھ پائیں۔
