سری نگر 13جنوری (سیاست ڈاٹ کام ) وادی کشمیر میں اتوار کی علی الصبح شروع ہونے والے برف باری کے تازہ مرحلے نے اتوار اور پیر کی درمیانی شب کے دوران شدت اختیار کرلی اور پیر کی صبح جب اہلیان کشمیر نیند سے اٹھے تو برف کی موٹی چادر نے پوری وادی کو اپنی لپیٹ میں لے لیا تھا۔بھاری برف باری کے نتیجے میں جہاں وادی کشمیر کا بیرون دنیا سے فضائی رابطہ پیر کو مسلسل دوسرے دن بھی منقطع رہا وہیں وادی کے لئے شہ رگ کی حیثیت رکھنے والی سری نگر جموں قومی شاہراہ بھی مسافر بردار گاڑیوں کی آمدورفت کے لئے بند ہی رہی۔ نیز شمالی کشمیر کے بارہمولہ اور جموں خطہ کے بانہال کے درمیان چلنے والی ریل خدمات پٹریوں پر برف جمع ہونے کی وجہ سے معطل رہیں۔تازہ اور بھاری برف باری کی وجہ سے جہاں وادی بھر میں معمولات زندگی مفلوج ہوکر رہ گئے ہیں وہیں بجلی کا نظام ایک بار پھر بری طرح سے متاثر ہوکر رہ گیا ہے جس کے نتیجے میں وادی کے بیشتر علاقے گھپ اندھیرے میں ڈوب گئے ہیں۔ نیز ڈش ٹی وی خدمات بری طرح متاثر ہوجانے کے ساتھ ساتھ کیبل ٹی وی اور لینڈ لائن ٹیلی فون لائنوں کو نقصان پہنچا ہے ۔تاہم کشمیر میں موجود چند سو ملکی و غیر ملکی سیاح تازہ برف باری سے خاصے خوش نظر آرہے ہیں۔ انہیں پیر کے روز مشہور سیاحتی مقامات بالخصوص گلمرگ اور پہلگام میں برستی برف کے قدرتی نظاروں سے لطف اندوز اور یادگاری تصویریں و ویڈیوز بنوانے میں مصروف دیکھا گیا۔ لیکن وہ کشمیر میں انٹرنیٹ خدمات کی کلی معطلی کی وجہ سے ان خوبصورت لمحوں کو سوشل میڈیا کی ویب سائٹس پر براہ راست نشر نہیں کرپائے ۔ادھر وسطی کشمیر بالخصوص سری نگر میں پیر کے روز موسلادھار بارشوں کی وجہ سے بیشتر سڑکیں زیر آب آگئیں جس کی وجہ سے گاڑیوں کی آمدورفت متاثر ہوجانے کے علاوہ راہگیروں کو بھی عبور و مرور میں تکلیف دہ صورتحال کا سامنا کرنا پڑا۔ سری نگر کی بعض سڑکوں پر دو سے تین فٹ پانی کھڑا ہوگیا تھا۔
