لداخ کو آئین کے چھٹے شیڈول میں شامل کرنے کی وکالت‘راہول گاندھی کا بیان
نئی دہلی ۔28؍ستمبر( ایجنسیز )کانگریس لیڈر اور لوک سبھا میں اپوزیشن لیڈر راہول گاندھی نے اتوار کے روز الزام عائد کیا کہ بی جے پی اور راشٹریہ سیویم سیوک سنگھ (آر ایس ایس) لداخ کے لوگوں، ان کی ثقافت اور روایات پر حملہ کررہے ہیں۔ انہوں نے لداخ کو آئین کے چھٹے شیڈول میں شامل کرنے کی وکالت کی اور تشدد، قتل اور دھمکیوں کو روکنے کا مطالبہ کیا۔ یہ بیان لیہہ میں چہارشنبہ کے روز ہوئے تشدد کے تناظر میں سامنے آیا جہاں جھڑپوں کے دوران چار افراد ہلاک اور متعدد زخمی ہوئے تھے۔ اس تشدد کے بعد سے، فسادات میں ملوث ہونے کے الزام میں 50 سے زائد افراد کو حراست میں لیا گیا ہے۔لداخ کو ریاستی درجہ دینے اور چھٹے شیڈول کے نفاذ کے مطالبے کے سلسلے میں ماحولیاتی کارکن سونم وانگ چک کو قومی سلامتی ایکٹ (این ایس اے) کے تحت حراست میں لیا گیا اور انہیں راجستھان کی جودھپور جیل میں منتقل کیا گیا۔ راہول گاندھی نے سوشل میڈیا پلیٹ فارم ’ایکس‘ پر اپنے بیان میں کہا کہ لداخ کے شاندار لوگ، ان کی ثقافت اور روایات بی جے پی اور آر ایس ایس کے نشانے پر ہیں۔ انہوں نے کہا کہ جب لداخ کے لوگوں نے اپنی آواز اٹھائی تو بی جے پی نے چار نوجوانوں کی جان لیکر اور سونم وانگ چک کو جیل میں ڈال کر جواب دیا۔ انہوں نے مطالبہ کیا کہ قتل، تشدد اور دھمکیاں بند کی جائیں اور لداخ کو اس کی آواز اور چھٹا شیڈول دیا جائے۔لیہہ میں تشدد کے بعد سے اتوار کو مسلسل پانچویں روز کرفیو نافذ رہا۔ حکام کے مطابق لداخ کے لیفٹیننٹ گورنر کویندر گپتا کرفیو میں نرمی کے بارے میں فیصلہ کرنے کیلئے سیکورٹی جائزہ اجلاس منعقد کریں گے۔ چہارشنبہ کے روز لیہہ ایپکس باڈی (ایل اے بی) کی جانب سے بلائے گئے بند کے دوران مظاہرین اور سیکورٹی فورسز کے درمیان پرتشدد جھڑپیں ہوئیںجو لداخ کو ریاستی درجہ دینے اور چھٹے شیڈول کے نفاذ کے مطالبات کے حوالے سے مرکزی حکومت کے ساتھ مذاکرات کو آگے بڑھانے کیلئے تھیں۔ ہفتہ کے روز لیہ میں کرفیو میں چار گھنٹے کی نرمی دی گئی تھی۔ سونم وانگ چک، جو لیہہ ایپکس باڈی اور کرگل ڈیموکریٹک الائنس کے زیر اہتمام چلنے والی تحریک کے مرکزی چہرے ہیں نے تشدد کی مذمت کی اور اپنی 15 روزہ بھوک ہڑتال ختم کر دی۔ انہوں نے کہا کہ تشدد سے ان کی پانچ سالہ پرامن جدوجہد کو نقصان پہنچا ہے۔ دوسری جانب مرکزی وزارت داخلہ نے سونم وانگ چک پر الزام لگایا کہ ان کے اشتعال انگیز بیانات کی وجہ سے ہجوم نے بی جے پی دفتر اور سرکاری املاک پر حملہ کیا۔ لیہہ میں تشدد کے بعد سیکورٹی فورسز نے شہر میں بڑے پیمانے پر گشت شروع کر دیا اور حالات کو کنٹرول کرنے کیلئے آنسو گیس اور لاٹھی چارج کیا۔