سری نگر، 8 جولائی (یو این آئی) وادی کشمیر میں دو ہفتوں کے گرمائی تعطیلات کے بعد منگل کی صبح اسکول دوبارہ کھل گئے ۔ واضح رہے کہ شدید گرم لہر کے پیشِ نظر محکمہ تعلیم نے وادی کشمیر کے تمام سرکاری اور نجی اسکولوں میں 23 جون سے 15 روزہ گرمیوں کی تعطیلات کا اعلان کیا تھا۔ وادی کشمیر میں نئے اوقات کار کے مطابق تمام سرکاری و غیر سرکاری اسکول منگل کی صبح دوبارہ کھل گئے ۔ تفصیلات کے مطابق وادی کے شہر و گام میں بچوں کو صبح سویرے ہی وردیوں میں ملبوس اسکولوں کی طرف جاتے ہوئے دیکھا گیا جبکہ خانگی اسکولوں میں زیر تعلیم بچوں کو اپنے اسکولوں کی گاڑیوں کا انتظار کرتے ہوئے دیکھا گیا۔ وزیر تعلیم سکینہ یتو نے گذشتہ روز ایکس پر اپنی ایک پوسٹ کے ذریعہ منگل سے اسکول دوبارہ کھلنے کا اعلان کردیا۔ انہوں نے کہا کہ ہم وادی اور جموں کے سرمائی زون میں منگل سے اسکول دوبارہ کھول رہے ہیں۔ انہوں نے مزید کہا کہ میونسپل حدود کے اندر آنے والے اسکول صبح 7:30 سے 11:30 بجے تک کھلے رہیں گے۔
