سری نگر02اگست(یو این آئی) جنوبی کشمیر کے ضلع کولگام کے اکھل جنگلی علاقے میں سیکورٹی فورسز اور دہشت گردوں کے مابین شدید فائرنگ کے دوران دو عسکریت پسند مارے گئے ۔ذرائع کے مطابق جمعہ کی شام اکھل دیوسر علاقے میں دہشت گردوں کی موجودگی کی اطلاع ملنے پر فوج، جموں و کشمیر پولیس اور سی آر پی ایف کی مشترکہ ٹیم نے علاقے کو محاصرے میں لے کر تلاشی کارروائی شروع کی۔ جوں ہی سیکورٹی اہلکار مشتبہ مقام کے نزدیک پہنچے وہاں چھپے عسکریت پسندوں نے اندھا دھند فائرنگ شروع کر دی جس کے جواب میں فورسز نے بھی پوزیشن سنبھال کر منہ توڑ جواب دیا۔دفاعی ذرائع نے بتایا کہ رات بھر رک رک کر گولیوں کا تبادلہ جاری رہا اور ہفتہ کی صبح ایک عسکریت پسند کی نعش برآمد کی گئی۔ اس کے بعد جب فورسز نے دوبارہ آپریشن تیز کیا تو ایک اور دہشت گرد کی ہلاکت ہوئی۔ تاہم مارے گئے دونوں دہشت گردوں کی شناخت فوری طور پر ممکن نہ ہو سکی۔ذرائع کے مطابق علاقے میں مزید عسکریت پسند وں کی موجودگی کو خارج از امکان قرار نہیں دیا جا سکتا جس کے پیش نظر جنگلی علاقے کو مکمل طور پر سیل کر کے فرار کے تمام راستے بند کر دئے گئے ہیں۔ سیکورٹی فورسز نے جنگل کی طرف جانے والی سڑکوں کو کانٹے دار تار سے بند کر دیا ہے اور کسی بھی شہری کو وہاں جانے کی اجازت نہیں دی جا رہی ہے ۔علیحدہ اطلاع کے مطابق دہشت گرد وں کے ساتھ تصادم میں تین دہشت گرد وں کے مارے جانے کی اطلاع ہے۔حالیہ عرصہ میں کشمیر کے مختلف مقامات پر پولیس اور سی آر پی ایف کی مشترکہ کارروائیوں میں دہشت گردوں کے ساتھ تصادم کے واقعات پیش آچکے ہیں ۔
