حیدرآباد9 نومبر(یواین آئی)کلاس روم میں بچوں کو درس دیتے ہوئے دل کا دورہ پڑنے سے ایک ٹیچر کی موت ہوگئی۔ یہ افسوسناک واقعہ آندھراپردیش کے مغربی گوداوری ضلع کے پاٹیم پالم ایم پی پی اسکول میں پیش آیا۔ 50سا لہ وینکٹیشور راؤ پاٹیم پالم ایم پی پی اسکول میں ٹیچر تھے اور ان کی بیوی بھی ایک اور اسکول کی ٹیچر ہے یہ جوڑا علحدہ اسکولوں میں بطور ٹیچر کام کرتاہے ۔وینکٹیشور راؤ نے پیر کے روز صبح کی ڈیوٹی ختم کرکے دوپہر میں کھانا کھایا۔کھانے کے بعد دوپہر کی ڈیوٹی کے دوران کلاس میں وینکٹیشور راؤ بچوں کو درس دے رہے تھے اچانک وہ دل کا دورہ پڑنے سے کلاس روم میں گر گئے ۔ وینکٹیشور راؤ کو فوری طور پر اسپتال پہنچایا جہاں ان کی علاج کے دوران موت ہوگئی۔ڈاکٹروں نے بتایا کہ وینکٹیشور راؤ کو شدید دل کا دورہ پڑنے سے موت ہوگئی۔