دہرادون / نئی دہلی۔ وزیراعظم مودی نے اپیل کی کہ دو شاہی اسنان مکمل ہوچکے ہیں ، لہذا اب کمبھ کو علامتی طور پر رکھا جائے ۔ اس سے وباکے خلاف جنگ میں تقویت ملے گی۔ یہ اطلاع خود مودی نے ٹویٹ کرکے دی۔ وزیر اعظم نریندر مودی نے ہفتہ کی صبح اتراکھنڈ کے ہری دوار میں جونا اکھاڑہ کے اچاریہ مہامنڈلیشور سوامی اودھیش آنند گری سے فون پر بات کرکے تمام سنتوں کی صحت کی معلومات حاصل کی اور انتظامیہ کے ساتھ مکمل تعاون کے لئے سنت برادری کے تئیں اظہار تشکر کیا۔ وزیر اعظم سے بات کرنے کے بعد ، اچاریہ مہا منڈلیشور سوامی اودھیش آنند گری نے مودی کی اپیل کا احترام کرتے ہوئے صبح پریس کانفرنس میں اپنا رد عمل ظاہر کیا۔ انہوں نے عقیدت مندوں سے گزارش کی کہ وہ کووڈ کے حالات کو دیکھتے ہوئے بڑی تعداد میں اسنان کے لئے نہ آئیں اور انہیں کووڈ کے اصولوں پر عمل کرنا چاہئے ۔واضح رہے کہ کووڈ انفیکشن کی وجہ سے ، دو اکھاڑوں نے ہفتے کے روز کمبھ ختم کرنے کا اعلان کیا تھا۔
