حیدرآباد۔ پڑوسن کمسن طالبہ کو کافی پلا کر حاملہ کرنے والے پڑوسی کو عدالت نے عمر قید کی سزا سنائی ہے۔ ایم ایس 2 عدالت نے سال 2016 کے ایک مقدمہ میں آج فیصلہ سناتے ہوئے ملزم 32 سالہ وی پروین کمار عرف کمار پلمبر کو عمر قید کی سزا اور 10 ہزار روپئے جرمانہ عائد کرتے ہوئے فیصلہ سنایا۔ اگسٹ 2015 میں گھٹکیسر پولیس نے ایک شکایت حاصل کرنے کے بعد مقدمہ درج کیا اور تحقیقات کوانجام دیتے ہوئے اس وقت کے انسپکٹر بی پرکاش نے جو فی الحال سائبر کرائم رچہ کنڈہ شعبہ میں خدمات انجام دے رہے ہیں تحقیقات کا آغاز کیا تھا اور ملزم کے خلاف ٹھوس ثبوت اکٹھا کرکے عدالت میں پیش کیا۔ 17 سالہ متاثرہ لڑکی پروین کمار کے پڑوس میں رہتی تھی جو اکثر پروین کمار کی بیوی سے ملاقات کیلئے اس کے مکان جایا کرتی تھی۔ بیوی کی غیر موجودگی میں پروین اس لڑکی کو یہ کہتے ہوئے اپنے مکان بلایا کرتا تھا کہ اس کی بیوی نے یاد کیا ہے۔ لڑکی کو کافی میں نشیلی دوا ملا کر دیتا تھا اور جیسے ہی لڑکی اس کا استعمال کرتی تھی اس کی آڑ میں اس نے کئی مرتبہ اس کمسن طالبہ سے جنسی وابستگی کی اور ہر مرتبہ بیوی بلانے کے بہانے کافی دے کر اس کا استحصال کرتا رہا۔ لڑکی اس دوران 7 ماہ کی حاملہ ہوگئی اور شکایت کے بعد پولیس نے کارروائی کی اور آج عدالت نے فیصلہ سنایا۔
