بھوپال: مدھیہ پردیش کے سابق وزیر اعلی کمل ناتھ نے کانگریس کارکنوں سے پارٹی لیڈر راہول گاندھی کی ‘بھارت جوڑو نیائے یاترا’ میں شامل ہو کرراہول کا ’سنبل‘بننے کی اپیل کی ہے ۔ کمل ناتھ نے آج اپنی ایکس پوسٹ میں کہاکہ مدھیہ پردیش کے لوگ اور کانگریس کارکن راہول گاندھی کی بھارت جوڑو نیائے یاترا کا استقبال کرنیکیلئے پرجوش ہیں۔ ہمارے لیڈر راہول گاندھی نے پورے ملک میں سڑکوں پر نکل کر ناانصافی، جبر اور استحصال کے خلاف فیصلہ کن لڑائی کا اعلان کیا ہے ۔انہوں نے کہا کہ وہ مدھیہ پردیش کے لوگوں اور کانگریس کارکنوں سے اپیل کرتے ہیں کہ وہ زیادہ سے زیادہ تعداد میں بھارت جوڑو نیائے یاترا میں شامل ہو کر راہول گاندھی کی طاقت اور ہمت بنیں۔ انہوں نے دعویٰ کیا کہ سب مل کر ناانصافی کے خلاف اس عظیم مہم کو پایہ تکمیل تک پہنچائیں گے ۔پچھلے کچھ دنوں سے کمل ناتھ کے کانگریس چھوڑ کر بھارتیہ جنتا پارٹی میں شامل ہونے کی قیاس آرائیاں ہو رہی تھیں۔ ایسے میں ان کی اس یاترا میں شرکت پر شک کے بادل چھائے ہوئے تھے ۔ تاہم دو روز قبل انہوں نے اس دورے کے حوالے سے منعقدہ اجلاس میں ورچولی طور پر شرکت کرکے ان قیاس آرائیوں کو کافی حد تک ختم کرنے کی کوشش کی تھی۔ انہوں نے اس یاترا میں شرکت کی بات بھی کہی تھی۔راہول گاندھی کی یاترا مورینہ سے 2 مارچ کو مدھیہ پردیش میں داخل ہوگی۔ اس یاترا کے سلسلے میں راہول گاندھی 6 مارچ تک مدھیہ پردیش میں رہیں گے ۔ 6 مارچ کو ان کی یاترا رتلام کے سیلانہ کے راستے راجستھان میں داخل ہوگی۔