میلبورن ۔11اپریل (سیاست ڈاٹ کام)کورونا وائرس کے خطرے کی وجہ سے انڈین پریمیئر لیگ (آئی پی ایل) کے انعقاد سے متعلق چل رہے شکوک کے درمیان آسٹریلیا کے فاسٹ بولر پیٹ کمنز نے کہا ہے کہ وہ میدانوں میں شائقین کے بغیر اس ٹورنمنٹ میں کھیلنے کے لئے تیار ہیں۔کورونا کے خطرے کو دیکھتے ہوئے آئی پی ایل کو 15 اپریل تک ملتوی کیا گیا تھا لیکن ملک میں کورونا سے پیدا ہوئے حالات میں بہتری کی وجہ سے اور لاک ڈاون بڑھا دیا گیا ہے ۔کمنز کو وزڈن نے سال کے پانچ کرکٹرز میں شمارکیا ہے۔ 2019 دسمبر میں آئی پی ایل کے لئے ہوئی نیلامی میں آسٹریلیا کے پیٹ کمنز 15.5 کروڑ روپے میں کولکتہ کی ٹیم میں شامل ہوئے جو آئی پی ایل کی تاریخ میں کسی بیرونی کھلاڑی کے لئے آج تک کی سب سے بڑی رقم ہے۔حکومت ہند نے کورونا کی وجہ سے بیرونی افراد کے ملک میں آنے پر پابندی لگائی ہوئی ہے اور ایسے میں دوسرے ملک کے کھلاڑیوں کا آئی پی ایل میں کھیلنا ناممکن ہے۔ میدانوں میں ناظرین کے بغیر کھیلنے پر کمنز نے کہاکہ جی ہاں، میں اس کے لئے تیار ہوں اور ہمیں ایسے بڑے ٹورنمنٹ کو محفوظ حالات میں منعقد کرنے پر غور کرنا چاہئے۔ سب کے لئے پہلی ترجیح سیکورٹی ہے لیکن حالات معمول پر لانا بھی انتہائی ضروری ہے۔انہوں نے کہاکہ اسے منعقد کرنے کے لئے توازن قائم کرنے کی ضرورت ہے۔ اگر ناظرین کے بغیر یہ کرائے جا سکتے ہیں تو میں امید کرتا ہوں کہ یہ کیا جانا چاہئے اور لوگ اسے گھر بیٹھ کر ٹی وی پر بھی دیکھ سکتے ہیں۔غور طلب ہے کہ آئی پی ایل29 مارچ سے شروع ہونا تھا لیکن کورونا کے خطرے کو دیکھتے ہوئے اسے 15 اپریل تک ملتوی کیا گیا تھا۔ بی سی سی آئی مسلسل حالات پر نظر بنائے ہوئے ہے اور15 اپریل کی مدت بھی ختم ہونے کو ہے۔ اگرچہ بورڈ نے اب تک اس بارے میںکوئی فیصلہ نہیں لیا ہے لیکن حالات سے یہ صاف ہے کہ آئی پی ایل جلد منعقد نہیں ہوگا۔
