نئی دہلی : کورونا وائرس کووڈ 19 کے خلاف جنگ میں مدد کے لئے اسرائیل نے آل انڈیا انسٹی ٹیوٹ آف میڈیکل سائنسز(ایمس)، نئی دہلی کے ساتھ مصنوعی ذہانت (اے آئی) پر مبنی ٹکنالوجی اور جدید ترین آلات کا اشتراک کیا ہے ۔ایمس نے منگل کے روز اطلاع دی ہے کہ کورونا کے خلاف اسرائیلی۔ ہندوستان تعاون کے تحت اسرائیلی سفارتخانے نے اے آئی پر مبنی ٹکنالوجی اور جدید آلات ایمس کو دیئے ہیں۔ ہندوستان میں اسرائیلی سفیر ڈاکٹر رون مالکا نے یہ آلات اور ٹیکنالوجی ایمس کے ڈائریکٹر ڈاکٹر پروفیسر رندیپ کے حوالے کی۔ اس موقع پر مہمان خصوصی کے طور پر وزارت امور خارجہ کے سکریٹری سنجے بھٹاچاریہ بھی موجود تھے ۔ایمس میں اسرائیل کے ذریعہ پیش کردہ ٹیکنالوجیز میں اے آئی پر مبنی ویڈیو آپریٹیڈ آپرریٹیو اے آئی مددگار روبوٹ بھی ہے ۔ یہ ایک ایسا ایپ ہے جسے کورونا کے خلاف فرنٹ لائن پر ہیلتھ ورکرز کے موبائل فون میں انسٹال کیا جاسکتا ہے ۔ اس سے کووڈ 19 ڈپارٹمنٹ کے اندر اسپتال کے ملازمین کے لئے کام زیادہ موثر اور آسان ہوجاتا ہے ۔