نئی دہلی: کانگریس کے سابق صدر راہل گاندھی نے کورونا بحران کو زندگی میں تبدیلی کا لانے کا ایک بڑا موقع قرار دیا ہے اور اسے اپناکر آگے بڑھنے کا مشورہ دیتے ہوئے کہا کہ دیہی زندگی میں تبدیلی لانے کے لئے یہ موقع ملاہے جسے ہاتھ جانے نہیں دینا چاہئے ۔راہول گاندھی نے گرامین بینک کے بانی اور نوبل امن انعام یافتہ پروفیسر محمد یونس سے گفتگو کرتے ہوئے کہا کہ کورونا نے اس سلسلے میں ایک نئے خیال کا موقع دیا ہے اور اب گاؤوں کے ساتھ مساوات کا برتاؤ کرنا ضروری ہے کیونکہ یہ گاؤں ہی ملک کی روح ہیں۔ کورونا بحران نے ہمیں چیزوں کو دوبارہ جوڑ کر دوبارہ تعمیر کرنے کا موقع دیا ہے اور تعلیم سے لیکر صحت تک چیزوں کو نئے سرے سے تیار کرنے کے ساتھ ہی ٹکنالوجی کو مضبوط بناکر دوبارہ تعمیر کے موقع فراہم کرنے ہوں گے ۔انہوں نے کہا ‘‘کورونا ملک کے لئے ایک بہت بڑا بحران بن کر آیا ہے لیکن اس بحران نے ہر ایک کی زندگی میں بھی تبدیلی کی ہے ۔ سب کو اس تبدیلی کو اپناتے ہوئے آگے بڑھنا ہوگا۔ اگر ہم اس تبدیلی کے بعد بھی آگے نہیں بڑھتے ہیں تو ہم نے بطور ملک یہ موقع گنوا دیا ہے ۔ ہمارے ملک کی یوتھ پاور میں قوم کی تعمیر کی بے پناہ صلاحیتیں موجود ہیں اور اس بحران میں اس صلاحیت کو ملکی تعمیر میں استعمال کیا جانا چاہئے ۔کانگریس لیڈر نے کہا کہ لاک ڈاؤن کی وجہ سے مہاجر مزدور مختلف ریاستوں میں پھنس گئے تھے اور انہیں وہ اپنے گاؤں واپس جانے پر مجبور تھے ۔ کانگریس نے محسوس کیا کہ انہیں فوری طور پر کھانا اور براہ راست نقد رقم فراہم کرنا ضروری ہے کیونکہ غیر منصوبہ بند لاک ڈاؤن غریب مزدوروں کی زندگیوں میں پریشانی کا باعث بن رہا تھا۔ اس صورتحال میں غریب مزدوروں کو فوری مالی مدد کے ساتھ راشن مہیا کرنے کی ضرورت تھی، لیکن بی جے پی حکومت نے غریبوں کے تئیں ایک الگ ہی نظریہ اختیار کر رکھا تھا۔
راہول گاندھی اور نوبل انعام یافتہ محمد یونس کے درمیان تبادلہ خیال
نئی دہلی : کانگریس کے سابق صدر راہل گاندھی نے آج بنگلہ دیش کے مشہور ماہر معیشت اور نوبل انعام یافتہ پروفیسر محمد یونس سے انتہائی اہم تبادلہ خیال کیا۔ دونوں کے درمیان کورونا سے پیدا حالات اور ہندوستانی معیشت کے تعلق سے بات چیت ہوئی جس میں محمد یونس نے کہا کہ ہندوستان کو معاشی پالیسی تبدیل کرنے کی ضرورت ہے تاکہ حالات بہتر ہو سکیں۔