طویل عرصہ تک لاک ڈاؤن غیر مفید،معیشت پر بھاری بوجھ برقرار: کپل سبل
نئی دہلی ۔ /25 اپریل (سیاست ڈاٹ کام) کانگریس نے آج حکومت سے اپیل کی کہ ڈیزاسٹر مینجمنٹ ایکٹ کے تحت کورونا وائرس بحران سے نمٹنے کیلئے کوئی نیشنل پلان وضع کیا جائے ۔ سینئر کانگریس لیڈر کپل سبل نے ویڈیو کانفرنس کے ذریعہ پریس کانفرنس میں کہا کہ لاک ڈاؤن جیسے اقدامات پر نظرثانی کرنا حکومت کا کام ہے اور اب وقت آچکا ہے ۔ کیونکہ ملک طویل عرصہ تک لاک ڈاؤن کا متحمل نہیں ہوسکتا اور معیشت پر بوجھ بڑھتا جارہا ہے ۔ موجودہ صورتحال کو یونہی طویل عرصہ تک نہیں رکھا جاسکتا ۔ یہ کوئی دانشمندانہ پالیسی نہیں ہے ۔ ہم محض تنقید نہیں کررہے ہیں بلکہ اتنا ہی کہہ رہے ہیں کہ اب نظرثانی کا وقت ہے ۔ ہم ہر ممکنہ طریقہ سے حکومت کی تائید کریں گے ۔ کپل نے عدلیہ سے بھی اپیل کی کہ کوئی پالیسی بناتے ہوئے انصاف رسانی کے نظام کو یقینی کریں اور دیکھیں کہ لازمی خدمات کو موجودہ بحران کے دوران کس طرح فراہم کیا جاسکتا ہے ۔ انہوں نے الزام عائد کیا کہ بیورو کریٹس جنہیں بنیادی حقائق کا کوئی اندازہ نہیں ، وہ لوگ لاک ڈاؤن کے دوران حکومت کی طرف سے پالیسی وضع کررہے ہیں ۔ سابق مرکزی وزیر نے کہا کہ ڈیزاسٹر مینجمنٹ ایکٹ 2005 ء کے مطابق مرکزی حکومت کووڈ۔ 19 سے نمٹنے کیلئے قومی منصوبہ طئے کرنے کی پابند عہد ہے ۔ انہوں نے حکومت پر الزام عائد کیا کہ اس مسئلہ پر مشکوک خاموشی برقرار رکھی جارہی ہے ۔ نیشنل پلان کی غیرموجودگی میں ایسا لگتا ہے کہ کووڈ۔ 19 سے نمٹنے کی مرکزی حکومت نے تمام تر ذمہ داریاں ریاستی حکومتوں پر ڈال دی ہیں ۔ کپل سبل نے نشاندہی کی کہ ضروری انفراسٹرکچر ناگزیر ہے جس کے بغیر ہم موجودہ وباء سے نہیں نمٹ سکتے ۔
