قاہرہ ۔ مصر کے دارالحکومت قاہرہ میں ایک شخص نے اپنی بیوی کو اپارٹمنٹ کی پانچویں منزل سے اس لیے نیچے پھینک دیاکیونکہ انہیں کورونا وائرس ہو گیا تھا۔عرب نیوزکے مطابق 25 سالہ خاتون زندہ بچ گئی ہیں اور انہیں ہمسایوں نے دواخانہ پہنچایا جہاں ان کی ریڑھ کی ہڈی کا آپریشن کیا گیا جبکہ ان کے خاوندکوگرفتارکرلیاگیا ہے اور پولیس معاملے کی تفتیش کر رہی ہے۔اس آدمی نے پولیس کو کہا کہ دونوں میاں بیوی کے درمیان جھگڑا ہوتا رہتا تھا اور وہ ایک دوسرے سے علیحدہ ہونا چاہتے تھے اور یہ معاملہ اس وقت سنگین صورت حال اختیارکرگیا جب خاتون کورونا کی شکارہو گئیں۔ شوہر نے کہا کہ مجھے متاثر ہونے کا خوف تھا۔ میری بیوی نے تین ٹسٹ کروائے جو مثبت آئے اورجب میں نے گھر چھوڑنے کا کہا تو اس نے انکارکردیا جس پر میں نے اسے دھکا دے دیا۔ حکام اب خاتون کے صحت یاب ہونے کا انتظار کر رہے ہیں تاکہ وہ ان کا بیان ریکارڈ کر سکیں۔ قاہرہ کے عین شمس یونیورسٹی ہسپتال کے ہڈیوں کے ڈاکٹر علی مزیاد نے کہا ہے کہ خاتون کی حالت تشویشناک ہے اور انہیں مکمل طورپر تندرست ہونے میں کئی ماہ لگ سکتے ہیں۔ یہ واقعہ لا ک ڈاؤن کے دوران مصر سمیت دنیا بھر میں ہونے والے گھریلو تشدد کی نشاندہی کرتا ہے۔ ماہر نفسیات نرمین جید نے کہا ہے کہ لاک ڈاؤن کی وجہ لوگ باہر نہیں جا سکتے اورگھروں میں قید ہوکر رہ گئے ہیں جس کی وجہ سے تشدد میں اضافہ ہو رہا ہے۔ انہوں نے کہا کہ ہم سب ایک کشتی میں سوار ہیں اور ایک ان دیکھے دشمن کا سامنا کر رہے ہیں۔ لہٰذا ہمیں ان حالات میں مل جل کر رہنا ہوگا۔