اقوام متحدہ : دنیا بھر میں کورونا سے متاثرہ افراد کی مجموعی تعداد اب تیس ملین سے زائد ہو گئی ہے، جب کہ اس عالمی وبا کے نتیجے میں ہونے والی مجموعی ہلاکتیں ایک ملین کے قریب پہنچ چکی ہیں۔ اس وائرس سے سب سے زیادہ متاثرہ ملک امریکہ ہے جہاں اس وائرس سے متاثرہ افراد کی تعداد پونے سات ملین کے قریب ہے جب کہ اس وبا کی وجہ سے ہلاکتوں کی تعداد دو لاکھ کے آس پاس ہے۔ ہندوستان اب اس فہرست میں دوسرے نمبر پر ہے، جہاں اب تک اس وائرس کی وجہ سے ترپن لاکھ سے زائد افراد متاثرہ ہوئے ہیں جب کہ مجموعی ہلاکتیں پچاسی ہزار چھ سو انیس ہیں۔ گزشتہ برس دسمبر میں چینی شہر ووہان میں سامنے آنے والا یہ وائرس دنیا کے دو سو دس ممالک اور خطوں میں تشخیص ہو چکا ہے۔