نئی دہلی۔30 مارچ (سیاست ڈاٹ کام)کیرلا کے رکن پارلیمنٹ نے اس ریاست سے ملحق کرناٹک کی سرحدوں کو بی ایس یدی یورپا حکومت کے ذریعہ بند کئے جانے کے فیصلے کے خلاف پیر کو سپریم کورٹ پہنچ گئی۔کیرلہ کے کاسرگوڈ پارلیمانی حلقہ سے کانگریس کے رکن پارلیمنٹ راج موہن انیتھن نے عدالت عظمی میں ایک مفاد عامہ کی عرضی دائر کرکے کرناٹک حکومت کے حکم کو چیلنج کیا ہے ۔یہ عرضی وکیل ہیرس بیرن کے ذریعہ دائر کی گئی ہے ۔عرضی گذار کا کہنا ہے کہ کرناٹک حکومت کے ذریعہ کیرلہ سے ملحق سرحد سیل کئے جانے کی وجہ سے ضروری اشیاء کی فراہمی متاثر ہوئی ہے ، اتنا ہی نہیں ان کے پارلیمانی حلقہ کے لوگ طبی سہولیات سے محروم ہورہے ہیں۔دراصل ان کی دلیل ہے کہ کاسرگوڈ کے رہنے والے برسوں سے منگلورو ضلع میں واقع طبی سہولیات پر انحصار کرتے آئے ہیں لیکن سرحد سیل ہونے کی وجہ سے یہ لوگ طبی سہولیات کے لئے منگلورو نہیں جارپارہے ہیں۔ ناکہ بندی کی وجہ سے ایمبولنس کو لوٹانے کی وجہ سے دو مریضوں کی موت ہوجانے کی بھی عرضی میں حوالے دیئے گئے ہیں۔عرضی گذار کی دلیل ہے کہ سرحد سیل کیا جانا مرکزی حکومت کے ان ہدایات کی خلاف ورزی ہے جس میں سبھی ریاستی حکومتوں کو بغیر کسی رکاوٹ کے مال اورخدمات کی بین ریاستی فراہمی کی اجازت دینے کے احکامات دیئے گئے ہیں۔پٹیشن کی ویڈیو کانفرنسنگ کے ذریعہ جلد سماعت کی بھی درخواست کی گئی ہے ۔
