پلازمہ تھراپی کا آزمائشی استعمال، ابتدائی نتائج حوصلہ افزاء 1779 افراد کو ہاسپٹل سے چھٹی
بیجنگ،20فروری(سیاست ڈاٹ کام) چین میں کورونا وائرس سے مزید 108 افراد ہلاک ہوگئے جس کے بعد وائرس سے مرنے والوں کی تعداد 2118 ہو گئی ہے ۔ چین میں متاثرہ افراد کی تعداد 74 ہزار سے زیادہ ہوگئی۔گزشتہ24گھنٹوں کے دوران تقریباً 394 لوگوں میں یہ وائرس پایا گیاہے ۔چین میں اب تک کل 74576اس کی زد میں آچکے ہیں۔اس وبا سے شفایاب 10337افرد کو چھٹی دی جاچکی ہے ۔چینی حکام کے مطابق چین میں کورونا وائرس سے متاثرہ افراد میں پیرا میڈیکل اسٹاف بھی شامل ہے ۔ چین میں ڈاکٹرز اور نرسوں کو بھی مریضوں کے علاج میں مشکلات کا سامنا ہے۔اطلاعات ہیں کورونا وائرس سے ایران میں بھی 2 لوگ ہلاک ہوچکے ہیں جبکہ تائیوان، فلپائن، ہانگ کانگ، جاپان اور فرانس میں 5 افراد کی موت ہوچکی ہے ، دیگر کئی ملکوں میں متعدد افراد بیماری میں مبتلا ہیں۔چین کے شہر شنگھائی میں کورونا وائرس کے علاج کے لیے پلازمہ تھراپی کا آزمائشی استعمال کیا جارہا ہے ، عالمی ادارہ صحت نے پلازمہ تھراپی کو بہت درست قرار دیا ہے۔ عالمی ادارۂ صحت کا کہنا ہے کہ کورونا وائرس کے خلاف طریق علاج کے سلسلہ میں پلازمہ تھریپی ایک اہم دریافت ہے ۔شنگھائی پبلک ہیلتھ کلینک کے مطابق پلازمہ تھراپی کو جانچنے کے لیے اسپیشل کلینک بنائے گئے ہیں، جبکہ تھراپی کے لیے کورونا وائرس سے صحتیاب مریضوں کو منتخب کیا جا رہا ہے جو طریق کار کے لئے خون دینے پر رضا مند ہیں، پلازمہ تھراپی کے ابتدائی نتائج حوصلہ افزا ہیں۔قومی صحت کمیشن نے جمعرات کو بتایا کہ چین کے 31صوبوں میں چہارشنبہ کو 394نئے معاملے سامنے آئے ہیں۔اس دوران کورونا وائرس سے ہوبئی صوبے میں ہیبوئی، شنگھائی، فوزیان، شانڈونگ، یوننان اور شانکسی میں ایک ایک موت ہوگئی ہے ۔چین میں چہارشنبہ کو 1277لوگ کوروناوائرس میں مبتلا ہونے کے شبہ کے دائرے میں آئے ہیں۔کل ہی 1779لوگوں کو ٹھیک ہونے کے بعد ہاسپٹل سے چھٹی دے دی گئی۔چین میں کورونا وائرس سے مرنے والے لوگوں کی تعداد بڑھکر2118ہوگئی ہے اور اب تک 74576لوگ اس سے متاثر پائے گئے ہیں۔واضح رہے کہ کورونا وائرس کا پہلا معاملہ دسمبر میں چین کے ہوبئی صوبے کے ووہان شہر میں سامنے آیاتھا اور اس کے بعد سے یہ دنیا کے 25سے زیادہ ملکوں میں پھیل چکا ہے ۔جنوری کے آخر میں عالمی ادارہ صحت نے کورونا وائرس کے بڑھتے انفیکشن کے پیش نظر عالمی صحت کے لئے ایمرجنسی کا اعلان کیاتھا۔