واشنگٹن ؍ سیول ۔ 27 فبروری (سیاست ڈاٹ کام) امریکہ اور جنوبی کوریا نے سالانہ جنگی مشقوں کو ملتوی کرنے کا اعلان کیا ہے۔ بتایا گیا ہے کہ ان مشترکہ فوجی مشقوں کے التوا کا فیصلہ کورونا وائرس کے پھیلاؤ کے تناظر میں کیا گیا۔ امریکہ اور جنوبی کوریا کے متعدد فوجی کورونا وائرس سے متاثر ہوئے ہیں اور اس وقت کئی فوجیوں کو قرنطینہ کرنے کے ساتھ ساتھ متعدد عسکری تنصیبات بند کی جا چکی ہیں۔ بتایا گیا ہے کہ جنوبی کوریا میں 20 کوریائی فوجیوں اور ایک امریکی فوجی میں کورونا وائرس کی موجودگی کی تشخیص ہو چکی ہے۔ جنوبی کوریا میں کورونا وائرس سے متاثرہ افراد کی تعداد 16 سو ہو چکی ہے، جو چین کے بعد سب سے زیادہ ہے۔