مکہ مکرمہ۔4 مئی(سیاست ڈاٹ کام) کورونا وائرس کی وجہ سے آب زم زم کی سربراہی متاثر ہوئی ہے لیکن اس کے باوجود سعودی عرب میں کنگ عبداللہ پروجیکٹ برائے آب زم زم روزانہ زم زم کے 2 لاکھ سے زیادہ کین تیار کر رہا ہے۔کنگ عبداللہ پروجیکٹ کے ایگزیکٹیو ڈائریکٹر انجنیئر احمد کعکی نے کہا ہے کہ ادارہ ٹھیکیداروں کے لیے زم زم کے روزانہ دو لاکھ کین تیار کرنے کے موقف میں ہے۔ادارے کا ایک گودام بھی ہے جہاں 20 لاکھ زیادہ زم زم کین محفوظ کیے جاسکتے ہیں۔تفصیلات کے مطابق انجنیئر احمد کعکی نے کہا ہے کہ کورونا وائرس کی وجہ سے آب زم زم پروجیکٹ میں زم زم کین کے اجرا کا عمل متاثر ہوا ہے۔اس کے باوجود زم زم پروجیکٹ نے (پانڈا) اور آن لائن ایپ (منصتہ) کے توسط سے7 لاکھ سے زیادہ زم زم کین مارکیٹ کے حوالے کیے ہیں۔زم زم کین کے نرخوں کے حوالے سے انہوں نے واضح کیا کہ منصتہ ایپ کے ذریعے پانچ لٹر والا کین ساڑھے سات ریال میں مہیا کیا جارہا ہے۔کین کے علاوہ ہوم ڈلیوری سروس اور کین کو پلاسٹک کور میں محفوظ کرنے کے چارجز شامل ہوتے ہیں۔انہوں نے کہا کہ منصتہ آن لائن کے ذریعے زم زم کی فراہمی ابھی مکہ مکرمہ کی حد تک محدود ہے۔ایک صارف صرف 4 کین ہی آن لائن طلب کرسکتا ہے۔پانڈا کی تمام شاخوں میں جو مملکت بھر میں پھیلی ہوئی ہیں ایک کین پانچ ریال میں فراہم کیا جارہا ہے۔ایک صارف ایک مرتبہ میں زم زم کے دو کین ہی حاصل کرسکتا ہے۔
