نئی دہلی،22اپریل (سیاست ڈاٹ کام) مرکزی حکومت کورونا وائرس کوویڈ۔19 سے نمٹنے کے لئے سبھی ریاستوں اور مرکز کے زیر انتظام ریاستوں کے ساتھ مل کر بہت سے اقدامات کررہی ہے ۔جس میں اس وبا کی روک تھام،قابو اورنظم وضبط کے اقدامات شامل ہیں۔اور ان کا اعلیٰ سطح پر جائزہ بھی لیا جا رہا ہے ۔مرکزی وزیر داخلہ امیت شاہ ، وزیر صحت و خاندانی بہبود ڈاکٹر ہرش وردھن نے آج ویڈیو کانفرنسنگ کے ذریعہ انڈین میڈیکل ایسو سی ایشن کے سینئر نمائندوں اور ڈاکٹروں کے ساتھ تبادلہ خیال کیا اور کورونا وئرس سے لڑ رہے ڈاکٹروں کی حفاظت سے متعلق خدشات پر بھی غور کیا۔ امیت شاہ نے یقین دلایا کہ حکومت ڈاکٹروں کی حفاظت میں کوئی کسر نہیں چھوڑے گی۔وزارت صحت کی جانب سے آج جاری ایک سرکاری بیان میں کہا گیا ہے کہ وزارت صحت نے حال ہی میں سبھی ریاستوں اور مرکز کے زیر انتظام علاقوں کے چیف سکریٹریوں کو ہداہت دی ہے کہ وہ کوویڈ۔19 سے نمٹنے میں مصروف کارکنان کی حفاظت کو یقینی بنانے کے لئے تمام ضروری اقدامات کریں کیونکہ اس وقت ان کی خدمات اور مہارت کی ملک کو ضرورت ہے ۔ان ریاستوں اور مرکز کے زیر انتظام ریاستوں کوانسانی وسائل،صلاحیت کی تعمیر، انسانی وسائل کی تعمیر،طبی تحفظ،اسٹاف سے متعلق ہداہات، وقت پر تنخواہ کی ادائیگی،ذہنی امداد،پہلی صف کے طبی عملے کی ٹریننگ اورلائف انشورنس کور جیسے شعبوں میں مختلف اقدامات کرنے کی ہدایت دی گئی ہے ۔ابھی تک ملک میں کورونا وائرس کے کل 19984مصدقہ معاملے ہیں اور منگل سے اب تک 1383نئے معاملے سامنے آئے ہیں۔اس بیماری سے شفا یاب ہونے والوں کی کل تعداد3870ہے اور ان کی ریکوری شرح 19.36فیصد ہے۔ اس کے علاوہ اس مدت میں 50ہلاک بھی ہوئے ہیں،جس سے مرنے والوں کی تعداد بڑھ کر640ہوگئی ہے ۔
