l بڑے تجارتی ادارے بند l دنیا بھر میں ایمرجنسی جیسی صورتحال
نیویارک،24فروری(سیاست ڈاٹ کام) انٹر نیشنل مانیٹری فنڈ (آئی ایم ایف) نے کورونا وائرس کی وبا کو عالمی معیشت کے لئے مزید خطرناک قرار دے دیا۔خبر رساں ایجنسی ایف پی کے مطابق آئی ایم ایف کی سربراہ نے جی۔ 20ممالک کے وزرائے خزانہ اور مرکزی بینکوں کے گورنرز کو مطلع کیا کہ پہلے سے ہی کمزور عالمی معیشت کو مہلک کورونا وائرس کی وبا سے مزید خطرہ لاحق ہوگیا ہے ۔اس ضمن میں آئی ایم ایف کی سربراہ کرسٹالینا جورجیفا نے سعودی عرب میں منعقدہ ایک اجلاس میں کہا کہ ‘‘عالمی معیشت کی متوقع بحالی کا امکان انتہائی نازک ہے ’’۔انہوں نے کہا کورونا وائرس کے باعث عالمی سطح پر صحت سے متعلق ہنگامی صورت حال پیدا ہوگئی ہے ۔ان کا کہنا تھا کہ وائرس سے چین میں معاشی سرگرمیاں متاثر ہوئی ہیں اور اس کی بحالی کے امکانات بھی مایوس کن ہیں۔آئی ایم ایف کی سربراہ نے خبردار کیا کہ ’’وائرس پر تیزی سے قابو پانے کی صورت میں بھی چین اور باقی دنیا میں معاشی نمو پر فرق پڑے گا‘‘۔انہوں نے کہا کہ ‘‘کورونا کے نئے وائرس سے حالات تشویش ناک ہورہے ہیں، دوسری جانب چینی حکام نے وائرس کے پھیلاؤ کو روکنے کے لئے لاکھوں افراد کی نقل و حرکت کو انتہائی محدود کردی ہے جس کے معاشی طور پر بڑے منفی ثمرات نمایاں ہوں گے ’’۔واضح رہے کہ چین میں کورونا وائرس سے اب تک 2 ہزار 592افراد ہلاک ہوچکے ہیں، بیجنگ میں نقل و حرکت کے تمام ذرائع غیر فعال ہیں، تجارت میں خلل پڑ رہا ہے اور سرمایہ کار اپنے کاروبار کے دروازے بند کرنے پر مجبور ہیں۔کرسٹالینا جورجیفا نے ریاض میں دو روزہ اجلاس سے خطاب کرتے ہوئے کہا کہ اس وبا سے عالمی شرح نمو میں تقریبا اعشاریہ ایک فیصد کمی ہوجائے گی اور رواں برس چین کی شرح نمو 5.6 فیصد رہ جائے گی۔آئی ایم ایف کی سربراہ نے جی- 20 ممالک سے وائرس کے پھیلاؤ پر قابو پانے کے لیے تعاون کی اپیل کی۔انہوں نے کہا کہ وائرس ہمیں احساس دلارہا ہے کہ باہمی رابطوں کی اشد ضرورت ہے اور G-20 ایک اہم فورم ہے جس نے عالمی معیشت کو مزید مضبوط بنیادوں پر کھڑا کرنے میں مدد فراہم کی ہے ۔