کراچی ۔17 مارچ (سیاست ڈاٹ کام) پاکستان میں بڑھتے کورونا وائرس کے پیش نظر پاکستان سوپر لیگ (پی ایس ایل) سیزن 5 کو ملتوی کردیا گیا جس میں صرف سیمی فائنلز اور فائنل کھیلا جانا باقی تھا۔ذرائع کے مطابق پی سی بی کی جانب سے کورونا وائرس کے پیش نظر آج ہونے والے ایونٹ کے دونوں سیمی فائنلز اورکل (18 مارچ) کو ہونے والا فائنل کو فی الحال ختم کردیا گیا۔ بعد ازاں پاکستان کرکٹ بورڈ کی جانب سے ایک مختصر سی ٹوئٹ میں کہا گیا کہ ایچ بی ایل پی ایس ایل 2020 کو ملتوی کردیا گیا، اسے بعد میں ری شیڈول کیا جائے گا اور مزید تفصیلات بعد میں جاری کی جائیں گی۔ خیال رہے کہ اس سے قبل کورونا وائرس کے خطرے کے پیش نظر پی ایس ایل سیزن 5 میں پلے آف کا مرحلہ ختم کرکے سیمی فائنل تک کردیا گیا تھا اور 22 مارچ کو ہونے والے فائنل کو بھی 18 مارچ کو کردیا گیا تھا۔ اگر پاکستان میںکورونا وائرس کے معاملات کی بات کی جائے تو اس سے سب سے زیادہ صوبہ سندھ متاثر ہے جہاں مریضوں کی تعداد 150 تک پہنچ گئی ہے جبکہ اس کے بعد صوبہ خیبرپختونخوا میں 15 اور بلوچستان میں 10 معاملات درج ہوئے ہیں۔ علاوہ ازیں صوبہ پنجاب میں اب تک کورونا وائرس کے 2 مصدقہ معاملے ہیں جبکہ اسلام آباد میں 2 اور گلگت بلتستان میں 5 معاملات سامنے آچکے ہیں۔ دنیا بھر میں پھیلنے والے اس کورونا وائرس سے مختلف کھیلوں کے مقابلے متاثر ہوئے ہیں اور اس کا اثر پی ایس ایل سیزن 5 پر بھی پڑا ہے۔کورونا وائرس کے باعث پہلے سندھ کے دارالحکومت کراچی میں 13 مارچ سے پی ایس ایل کے میچز بغیر شائقین کے کروانے کا فیصلہ ہوا تھا جبکہ بعد ازاں لاہور کے قذافی اسٹیڈیم میں بھی شائقین کے بغیر میچز کروائے گئے تھے۔ اس کے علاوہ پی ایس ایل کو ری شیڈول کرتے ہوئے اس کے کراچی میں ہونے والے آخرکے میچز کو لاہور منتقل کردیا گیا تھا اور دونوں سیمی فائنلز اور فائنلز لاہور کے قذافی اسٹیڈیم میں کھیلے جانے تھے۔ اگر مجموعی طور پر پی ایس ایل کی ٹاپ 4 ٹیموں کی بات کریں جو سیمی فائنل تک پہنچی تھیں تو اس میں ملتان سلطانز، کراچی کنگز، لاہور قلندرز اور پشاور زلمی کی ٹیم شامل تھی۔ یہاں یہ بات یاد رہے کہ یہ پاکستان سوپر لیگ کی تاریخ میں پہلا موقع تھا کہ لاہور قلندرز کی ٹیم کسی بھی سیزن کے ناک آؤٹ مرحلے میں پہنچی تھی۔
