مکرم جاہ کی سالگرہ تقریب ، نواب ایم اے فیض خان کا اعلان
حیدرآباد۔6اکٹوبر(سیاست نیوز) آصف ہشتم پرنس والا شان نواب میرو برکت علی خان مکرم جاہ بہادر کی 88ویں سالگرہ کے موقع پر مکرم جاہ ٹرسٹ فار ایجوکیشن اینڈ لرننگ نے کورونا وائرس کا شکار ہونے والے افراد کے دو بچوں کو مفت تعلیم کی فراہمی کا فیصلہ کیا ہے۔ نواب ایم اے فیض خان ٹرسٹی مکرم جاہ ٹرسٹ فار ایجوکیشن اینڈ لرننگ نے آج مکرم جاہ بہادر کی سالگرہ تقریب سے خطاب کے دوران یہ اعلان کیا اور کہا کہ مکرم جاہ ٹرسٹ کی جانب سے کورونا وائرس کے سبب فوت ہونے والے افراد کے 2 بچوں کو مکمل مفت تعلیم کی فراہمی کے علاوہ اسی خاندان سے تعلق رکھنے والے تیسرے اور چوتھے بچہ کیلئے 12ماہ کی مفت تعلیم و تربیت کا فیصلہ کیا ہے۔ نواب میر برکت علی خان مکرم جاہ بہادر کی سالگرہ تقریب میں قونصل جنرل ترکی متعینہ حیدرآباد ڈاکٹر عدنان آلتے آلترینوس نے مہمان خصوصی کی حیثیت سے شرکت کی ۔انہو ںنے اس موقع پر نواب مکرم جاہ بہادر کی خدمات کی زبردست ستائش کرتے ہوئے کہا کہ مکرم جاہ بہادر کی تعلیمی میدان میں خدمات ناقابل فراموش ہیں۔ قونصل جنرل ترکی نے آصف سابع نواب میرعثمان علی خان کی تعلیم کے شعبہ میں خدمات کو زبردست خراج عقیدت پیش کرتے ہوئے کہا کہ نواب میر برکت علی خان مکرم جاہ بہادر بھی ان کے نقش قدم پر چلتے ہوئے تعلیمی ترقی پر توجہ مرکوز کئے ہوئے ہیں۔ جناب ایم فیض خان نے اس موقع پر اپنے خطاب کے دوران کہا کہ مکرم جاہ بہادر نے ملت کے نونہالوں کی تعلیمی ترقی کیلئے اپنی کئی جائیدادوں کو وقف کیا ہوا ہے اور اس ٹرسٹ کے ذریعہ اعلیٰ معیاری تعلیم کے انتظامات کئے جا رہے ہیں۔ انہو ںنے ترکی ۔حیدرآباد کے تعلقات اور تہذیبی ورثہ کا تذکرہ کرتے ہوئے کہا کہ ترکی اور حیدرآباد کے دیرینہ ثقافتی تعلقات رہے ہیں اور مکرم جاہ بہادر کی والدہ شہزادی درشہوار شاہ عبدالمجید ثانی کی دختر تھیں ۔ انہوںنے خلافت عثمانیہ اور سلطنت آصفیہ کے درمیان تعلقات کا تفصیلی تذکرہ کیا ۔ مکرم جاہ اسکول پرانی حویلی میں منعقدہ سالگرہ کی اس تقریب کے میں ٹرسٹی جناب خلیل احمد‘ مسز گیتاشیام سندر ‘ انچارج سیکریٹری ٹرسٹ محمد ہاشمی ‘ پرنسپل اسکول مسز ریکھا وادھے‘ ڈاکٹر ٹی پی شیلجا‘ کے علاوہ دیگر موجود تھے۔م
