ٹوکیو اولمپک کا 24 جولائی سے9 اگست تک انعقاد پر ہنوز خطرے کے بادل
امریکہ کے بشمول مختلف ممالک کے فیڈریشنوں کی جانب سے التواء کیلئے دباؤ
ٹوکیو، 22 مارچ (سیاست ڈاٹ کام )خطرناک کورونا وائرس کے خوف کے درمیان ٹوکیو اولمپک کی مشعل جمعہ کو جاپان پہنچ گئی۔ٹوکیو اولمپک 24 جولائی سے9 اگست تک منعقد ہونا ہے۔اولمپک مشعل کو ایتھنز سے لے کر ایک چارٹرڈ طیارے کے ذریعے ٹوکیو 2020 گو متسوشما میاگی واقع جاپان کے فضائیہ ٹھکانے پر پہنچا۔تین بار کے اولمپک طلائی فاتح یوشیدا نے طیارے سے مشعل کو وصول کیا اور انتظار کر رہے ٹوکیو 2020 کے صدر یوشرو موری کے حوالے کر دیا۔ان دونوں کھلاڑیوں اور موری کو ایتھنز میں مشعل برداری کرنے والی تقریب میں جاپانی وفد کا حصہ ہونا تھا لیکن اس وفد کو ہی تحلیل کر دیا گیا تھا۔سمجھا جاتا ہے کہ موری نے جاپان فٹ بال ایسوسی ایشن کے صدر ?وجو تاشما سے ملاقات کی تھی جو منگل کو کورونا سے متاثر پائے گئے تھے۔سابق جاپانی وزیر اعظم موری نے کم تعداد میں جمع افراد کو مخاطب کرتے ہوئے کہاکہ میں اس تقریب کا سلامتی کے ساتھ آغاز کے لئے سب کا شکریہ ادا کرتا ہوں۔پہلے ہمارا پروگرام تھا کہ مشعل کے استقبال کے لئے چھوٹے بچوں کو لایا جائے لیکن سیکورٹی کی وجہ سے ہم نے ایسا نہیں کیا۔موری نے تسلیم کیا کہ یہ دل توڑنے والا فیصلہ تھا لیکن انہوں نے ساتھ ہی محفوظ اولمپک کا وعدہ کیا۔اولمپک مشعل کی تقریب سے ناظرین کو دور رکھا گیا تھا اور اس تقریب میں چھوٹی تعداد میں ٹوکیو 2020 کے افسر شامل ہوئے۔جاپان میں مشعل ریلے کا آغاز 26 مارچ کو فوکوشیما سے ہوگا۔ پیرس سے موصولہ اطلاع کے مطابق اولمپکس کے آرگنائزرس پر ٹوکیو گیمس 2020ء کو ملتوی کرنے کے لئے مختلف ممالک کی جانب سے دباؤ بڑھ رہا ہے۔ خاص طور پر امریکی ٹریک اینڈ فیلڈ فیڈریشن نے بھی اس پر زور دیا ہے۔ فیڈریشن نے مکتوب روانہ کرتے ہوئے ملتوی کرنے کی درخواست کی ہے۔ اس نے کہا کہ ہر ایک کی صحت اور سیفٹی اولین ترجیح ہونی چاہئے۔ فرانس کی سوئمنگ فیڈریشن نے بھی اس پر درخواست کی ہے۔ ان کے علاوہ دنیا کی دیگر کئی کھیل کود کی تنظیموں کی بھی یہی رائے ہے۔دوسری طرف انٹرنیشنل اولمپک کمیٹی نے کھیلوں کو ملتوی کرنے کے مختلف گوشوں سے دباؤ کے پیش نظر رکن ممالک سے کورونا وائرس کے اثرات سے متعلق تفصیلات طلب کی ہیں۔ جمعہ کو آئی او سی کے صدر تھامس باچ نے نیویارک ٹائمس سے بات چیت میں کہا تھا کہ اولمپکس کو ملتوی کرنے کا فی الحال فیصلہ کرنا قبل از وقت ہوگا۔