مریضوں کیساتھ صحتیاب ہونے والوں کی تعداد میں بھی اضافہ ، پلازما عطیہ دینے چیف منسٹر دہلی کی اپیل
نئی دہلی۔دہلی میں کورونا وائرس کے معاملے تقریبا ایک لاکھ تک پہنچنے اور اس کے انفیکشن سے تین ہزار سے زیادہ لوگوں کی موت کے باوجود وزیراعلی اروندکجریوال نے پیر کو پھر اس بات اعادہ کیا کہ اس سے گھبرانے کی ضرورت نہیں ہے ۔کجریوال نے کہا ہے کہ انفیکشن کے معاملے ایک طرف بڑھ رہے ہیں تو دوسری طرف ٹھیک ہونے والوں کی تعداد میں بھی تیزی سے اضافہ ہورہا ہے ۔ مجموعی طور سے 99 ہزار 444 مریضوں میں 71339 کورونا کے مریض صحتیاب ہوچکے ہیں۔انہوں نے ویڈیو کانفرنسنگ کے ذریعہ میڈیا کوبتایا کہ گزشتہ ہفتہ کے مقابلے میں دہلی میں کورونا کی صورت حال اورزیادہ بہتر ہوئی ہے ۔ پلازما بینک شروع ہوگیا ہے ۔ انہوں نے لوگوں سے زیادہ سے زیادہ تعداد میں آکر پلازمہ عطیہ کرنے کی بھی دوبارہ اپیل کی۔ کجریوال نے کہا کہ 25,000 فعال کورونا کے مریضوں میں سے 15,000 کا علاج گھر پر کیا جارہاہے ۔ اموات کی شرح میں کمی آئی ہے ۔ دہلی میں ملک کا پہلا کورونا پلازما بینک کھولا گیاہے ۔ جانچ سے پتہ چلا ہے کہ پلازما تھیراپی کئی مریضوں کو ٹھیک کرنے میں مدد کرسکتی ہے ۔کجریوال نے بتایا کہ دہلی میں اب روزانہ 20,000 سے 24,000 کورونا ٹسٹ کئے جارہے ہیں ۔ جون مہینے کا ذکر کرتے ہوئے کجریوال نے کہا ہے کہ کم جانچ ہونے پر بھی ہر 100 میں سے 35 کورونا پازیٹیو آ تے تھے لیکن اب اس کی تعداد 100 میں سے 11 ہی ہے ۔ اسپتالوں میں تقریبا 5100 مریض بھرتی ہیں اور تقریبا 10000 بیڈ خالی ہیں۔ اس وقت دہلی میں جانچ اور بیڈ کی کوئی پریشانی نہیں ہے اور ایپ کے ذریعہ پتہ لگایا جاسکتا ہے کہ کہاں کتنے بیڈ خالی ہیں۔پلازما عطیہ کرنے والوں کی تعداد کم دیکھتے ہوئے وزیراعلی نے کہا ہے کہ اگر پلازما عطیہ کرنے والوں کی تعداد نہیں بڑھی تو اسٹاک میں جو پلازما رکھا ہے وہ سب ختم ہوجائے گا۔ انہوں نے ہاتھ جوڑ کر درخواست کی ہے کہ زیادہ سے زیادہ لوگ آگے آکر پلازما عطیہ کریں۔’’پلازما عطیہ کرنے کے وقت کی تکلیفوں کی افواہوں پر وزیراعلی نے کہا کہ ‘‘گھبرانے کی کوئی ضرورت نہیں ہے ، نہ ہی عطیہ دینے والے کو کمزوری آئے گی اور نہ ہی کوئی درد ہوگا۔ کچھ لوگوں کا کہنا ہے کہ اپنے ساتھ کسی کو لے کر جائیں گے تو انفیکشن ہوجائے گا، اس معاملے میں واضح کردوں کہ آئی ایل بی ایس ایک غیر کورونا اسپتال ہے ۔’’ کجریوال نے بتایا کہ ‘‘میری ایک ٹیم ٹھیک ہونے والے سبھی مریضوں کو فون کرکے پلازما عطیہ کرنے کی اپیل کررہی ہے ۔ اگر آپ کو فون آئے تو منع نہ کر یں اور ضرور عطیہ کریں، جتنے بھی اسپتال کوروناکا علاج کررہے ہیں وہ مریض کے ٹھیک ہونے پر اس کی کونسلنگ کریں اور اسے بتائیں کہ وہ ٹھیک ہوکر پلازما عطیہ کرسکتا ہے۔