متاثرین 95 ہزار سے متجاوز،29کروڑ بچے اسکول جانے سے محروم
جنیوا،5مارچ (سیاست ڈاٹ کام) دنیا بھر میں کورونا وائرس کے پھیلاؤ کو دیکھتے ہوئے اقوام متحدہ کے ادارہ یونیسکوکے مطابق دنیا کے 13ملکوں میں اسکول بند کردیئے گئے ہیں۔ایک محتاط اندازے کے مطابق کورو نا وائر س نے دنیا بھر کے 29 کروڑ بچوں کو اسکول جانے سے روک دیا ہے ۔ذرائع کے مطابق کورونا وائرس 80 سے زائد ملکوں تک پھیل چکا ہے اور اس سے دنیا بھر میں 3 ہزار 285 افراد ہلاک اور 95ہزار سے زائد متاثر ہیں۔واضح رہے کہ چین کے شہر ووہان سے شروع ہوئے اس وائرس سے گزشتہ 24 گھنٹو ں میں چین میں مزید 31 افراد ہلاک ہوئے ہیں جس کے بعد وہاں ہلاک افراد کی تعداد 3 ہزار سے تجاوز کر گئی ہے جبکہ 139 نئے کیس ا بھی سامنے آئے ہیں۔چین کو کرونا پر قابو پانے میں کامیابی تو ہوئی ہے مگر یہ وائرس 84 ملکوں تک پھیل گیا ہے اور دنیا بھر میں 3 ہزار 285افراد اس سے ہلاک ہوئے ہیں، 95 ہزار سے زائد متاثر ہیں اور 51ہزار سے زائد صحت یاب بھی ہو چکے ہیں۔امریکہ میں کورونا وائرس سے ہلاک افراد کی تعداد 11ہو گئی ہے ،جبکہ 130 افراد متاثر ین میں شامل ہیں۔ برطانیہ میں اس وائرس کے شکار مریضوں کی تعداد 87ہوگئی ہے ، وہاں متعدد عالمی کمپنیوں نے اپنے دفاتر بند کر لئے ہیں اور لندن کا سالانہ کتاب میلہ بھی منسوخ کر دیا گیا ہے ۔عراق میں کورونا سے ہلاک افراد کی تعداد 2 ہوگئی ہے ، اٹلی میں 107، ایران میں 92، فرانس میں 4، اسپین میں 2 اور آسٹریلیا میں بھی 2 افراد کی ہلاکت کی وجہ قرار پایا ہے ۔سوئیڈن میں کورونا سے متاثرہ مریضوں کی مجموعی تعداد 52 اور ناروے میں 56 ہوگئی ہے ۔