ریاض ۔ سعودی فوڈ اینڈ ڈرگ اتھارٹی کی جانب سے فائزرکمپنی کی کورونا ویکسین کی رجسٹریشن کی منظوری ملتے ہی ایرپورٹ پرویکسین ذخیرہ کرنے کے لئے تیاریاں مکمل کرلی گئی ہیں۔ شاہ خالد بین الاقوامی ایر پورٹ پر ویکسین کو ذخیرہ کرنے کے لئے کولڈ اسٹوریج کی صفائی سمیت دیگرانتظامات مکمل کرلئے گئے ہیں۔ اس ضمن میں کولنگ سسٹم کے ماہرین نے اسٹوریج کا جائزہ لینے کے بعد اسے مکمل طور پردرست قراردیا ہے۔اسٹوریج میں مخصوص درجہ حرارت کے مستقل بنیادوں پر برقراررہنے کو یقینی بناتے ہوئے احتیاطی پاورپلانٹ اورکولنگ سسٹم بھی نصب کیا گیا ہے تاکہ کسی بھی ہنگامی صورتحال میں متبادل سٹسم فوری کام شروع کردے۔اسٹوریج سے ادویات کی منتقلی کے لئے بھی خصوصی ٹینک اور گاڑیوں کا بندوبست بھی کرلیا گیا ہے۔فوڈ اینڈ ڈرگ اتھارٹی کے آپریشنل ڈائریکٹر ھشام الجضعی نے کہا کہ فائزر کی ویکسین جسے مملکت میں استعمال کی اجازت دی گئی ہے، اس بارے میں اتھارٹی کی جانب سے تین طریقوں سے اطمینان کیا گیا ہے۔ماہرین نے ان تمام رپورٹوں کا باریک بینی سے جائزہ لیا جو ویکسین کے تجرباتی مراحل پر مشتمل تھیں جن میں ویکسین کا تجربہ ایسے زیر علاج مریضوں پرکیا گیا تھا جن کی حالت خراب تھی۔ علاوہ ازیں حاصل کی جانے والی ویکسین کے معیارکو اتھارٹی کی جانب سے جانچا گیا ہے۔آپریشنل ڈائریکٹر نے مزیدکہا کہ وزارت صحت اور فوڈ اینڈ ڈرگ اتھارٹی کی مشترکہ ٹیموں کی جانب سیان تمام انتظامات کا باریک بینی سے جائزہ لیا جا رہا ہے تاکہ ویکسین کے آتے ہی اسے درست طریقے سے اسٹورکیا جائے۔
