ریاض ۔سعودی عرب نے کورونا ویکسین کے حصول کے لیے روس کے ساتھ معاہدہ کیا ہے۔الشرق الاوسط کے مطابق سعودی کیمیکل ہو لڈنگ گروپ اور روسی انویسٹمنٹ فنڈ نے معاہدے پر دستخط کیے ہیں۔ سعودی کیمیکل ہولڈنگ گروپ کی دوا ساز کمپنی اجا فارما اور سعودی انٹرنیشنل بزنس لمیٹڈ کمپنی (اسٹکو فارما) نے روسی انویسٹمنٹ فنڈ کے ساتھ جو معاہدہ کیا ہے اس کے بموجب روس سعودی عرب کو کورونا ویکسین فراہم کرے گا۔ مفاہمتی یادداشت میں یہ بات شامل ہے کہ روسی انویسٹمنٹ فنڈ اور سعودی کیمیکل ہولڈنگ گروپ مملکت میں ویکسین تیارکرنے کے لیے متعلقہ اداروں کی منظوری حاصل کریں گے۔ روس نے کہا ہیکہ وہ سعودی عرب سمیت متعدد ملکوں کو کورونا ویکسین فراہم کرے گا۔ یاد رہے کہ روسی انویسٹمنٹ فنڈ کے ڈائریکٹر جنرل کیرل دیمترت نے کہا تھا کہ سعودی عرب اور روس نے کورونا ویکسین کے کلینیکل ٹرائلز سے متعلق اصولی معاہدہ کیا ہے۔ امارات سے بھی اس حوالے سے بات طے پاگئی ہے۔ گزشتہ ماہ روس کے صدر ولادیمیر پوتن نے کہا کہ روس نے کورونا وائرس کی ویکسین تیارکر لی ہے جو کہ وائرس کے خلاف دیرپا ایمونٹی پیدا کرتی ہے۔ عالمی ادارہ صحت کے ایک جائزے کے مطابق اس وقت دنیا بھر میں 165 کمپنیاں ویکسین کی دوڑ میں شریک ہیں اور ان میں سے چھ کلینکل ٹرائل کے تیسرے مرحلے میں ہیں۔
