صدرٹرمپ جھوٹ بولتے رہے اور کورونا وائرس امریکی عوام میں پھیلتا گیا :جو بائیڈن
واشنگٹن: امریکی صدر نے کورونا کے مہلک ہونے کے معاملے پر اپنی ہی قوم کو بری طرح گمراہ کیا، ڈونالڈ ٹرمپ نے تسلیم کرلیا ہے کہ انہوں نے کورونا وباء کا خطرہ جان بوجھ کر کم کرکے ظاہر کیا اور دعویٰ یہ کیا ہے کہ ان کا مقصد افراتفری پھیلنے سے روکنا تھا۔صدر ٹرمپ کا معروف صحافی باب ووڈ وارڈ کو فروری، مارچ میں دیئے گئے تفصیلی انٹرویو کا کچھ سنسنی خیز حصہ سامنے آگیا جس میں ڈونالڈ ٹرمپ نے صحافی کو بتایاتھا کہ وہ کورونا وباء کا معاملہ کم کرکے پیش کرنا چاہتے تھے تاکہ افراتفری نہ پھیلے، تاہم انہوں نے صحافی کے سامنے 7 فروری کو ہی یہ تسلیم کرلیا تھا کہ کورونا مہلک وائرس ہے۔انٹرویو میں ٹرمپ کا یہ کہنا تھا کہ یہ ایک ایسا مہلک وائرس ہے جو آپ محض سانس لیں اور منتقل ہوجاتاہے، امریکی صدرنے صحافی کے سامنے مانا تھا کہ محض سانس لینے سے وائرس کا منتقل ہونا بہت پیچیدہ ہے اور یہ بھی کہ کورونا وائرس سخت زکام سے بھی زیادہ مہلک ہے۔اس معاملے پر عام عوام میں صدر ٹرمپ کی باتیں یکسر مختلف تھیں، 10فروری کو صدر ٹرمپ نے کہا تھا کہ کورونا اپریل کی گرمی میں غائب ہوجائے گا،وہ مارچ میں عوام کو لیکچر دے رہے تھے کورونا عام زکام سے کم مہلک ہے۔کتاب سے اقتباس میں یہ بھی ہے کہ قومی سلامتی مشیر برائن نے صدر ٹرمپ سے کہا تھا کورونا ان کے دور صدارت کا سب سے بڑاخطرہ ہے تاہم صدرٹرمپ نے قومی سلامتی مشیرکی جانب سے خبردار کیے جانے کو یاد تک نہ رکھا۔ صحافی کی کتاب میں یہ بھی ہے کہ سابق وزیر دفاع میٹس نے ٹرمپ کو خطرناک اور صدارت کیلئے نامناسب کہا تھا اور یہ بھی کہ صدر ٹرمپ نے جرنیلوں کو برابھلا کہا اور کہا کہ امریکی جرنیلوں کوتجارتی ڈیل سے زیادہ اتحادیوں کی فکرہے۔دوسری جانب صدرٹرمپ نے خود سے منسوب اقتباسات کی تردید سے گریز کیا ہے اور کہا ہے کہ وہ اس ملک کے چیئر لیڈر ہیں وہ پراعتمادی دکھانا چاہتے تھے۔ دریں اثناء امریکہ میں ڈیموکریٹک پارٹی کے صدارتی امیدوار جو بائیڈن نے امریکی صدر ڈونالڈ ٹرمپ پر کورونا وائرس سے متعلق دھوکا دہی کا الزام عائد کردیا۔امریکی ریاست مشی گن میں خطاب کے دوران جوبائیڈن نے کہا کہ ڈونالڈ ٹرمپ نے امریکہ کے لوگوں کو دھوکا دیا، انہوں نے جان بوجھ کر کورونا وائرس کی سنگینی سے متعلق جھوٹ بولا جو کہ ان کی ناکامی ہے۔صدارتی امیدوار نے کہا کہ ڈونالڈ ٹرمپ کورونا وائرس کی سنگینی جانتے تھے مگر وہ جان بوجھ کر جھوٹ بولتے رہے۔ سب سے برا یہ کہ انہوں نے امریکہ کے لوگوں سے جھوٹ بولا۔جو بائیڈ ن نے امریکی صدر پر تنقید کرتے ہوئے کہا کہ ڈونالڈ ٹرمپ اپنی ذمہ داری نبھانے میں ناکام رہے، وہ جھوٹ بولتے رہے اور کورونا وائرس ہمارے عوام میں پھیلتا گیا۔