بروسلز ۔26 مئی ۔( سیاست ڈاٹ کام ) یورپی کونسل میں انسداد دہشت گردی کی کمیٹی میں شامل ماہرین نے خبردار کیا ہے کہ دہشت گرد جماعتیں مستقبل میں ہتھیار کے طور پر وائرسز پھیلانے کا سہارا لے سکتی ہیں۔ واضح رہے کہ کورونا وائرس اس نوعیت کی وباؤں سے نمٹنے میں ’’جدید معاشروں کی کمزوری‘‘کو ظاہر کر چکا ہے۔امریکہ میں ’’نیشنل سنٹر فار بایو ٹکنالوجی انفارمیشن‘‘ کے ماہرین کی ایک رپورٹ کا خلاصہ پیر کے روز یورپی کونسل کی ویب سائٹ پر جاری کیا گیا ہے۔ اس میں کہا گیا ہے کہ ایسا خیال کرنے کی کوئی وجہ نظر نہیں آتی کہ دہشت گرد جماعتیں اس سبق کو ضائع کر دیں گی کہ وائرس معاشروں میں شورش اور افراتفری کو جنم دینے کی صلاحیت رکھتے ہیں۔ ماہرین کے مطابق دہشت گرد جماعتوں نے درحقیقت حیاتیاتی حملے کرنے کے حوالے سے اپنی صلاحیت اور قدرت کا تجربہ کرنا شروع کر دیا ہے۔ اس وائرس ہتھیار کا استعمال ’’انتہائی کارگر‘‘ ثابت ہو سکتا ہے۔ یہ روایتی دہشت گرد حملوں سے کہیں زیادہ بڑے پیمانے پر انسانی اور اقتصادی نقصانات کا سبب بن سکتا ہے۔
