حیدرآباد۔ ملک بھر میں کوویڈ کے معاملات میں بتدریج کمی اور ریاستوں کی جانب سے لاک ڈاون کے قواعد میں نرمی کے بعد حیدرآباد انٹرنیشنل ایرپورٹ (آر جی آئی اے ) نے اس وبا کے خلاف لڑائی کی تیاری کی ہے تاکہ مسافرین کو محفوظ اور آسان سفر کے تجربہ سے ہمکنار کروایا جاسکے ۔ بدھ کو اس سلسلہ میں جاری کردہ بیان میں آرجی آئی اے نے کہاکہ کوویڈ کے پروٹوکول جیسے ماسک کے استعمال، سماجی فاصلہ کے اصولوں پر عمل کرتے ہوئے اس مشکل گھڑی میں فضائی سفر کو آسان بنایاجارہا ہے ۔انہوں نے کہاکہ ایرپورٹ بھر میں بیداری کی علامات لگائی گئی ہیں۔ ساتھ ہی احتیاط اور سینی ٹائزیشن کے بارے میں بھی بیداری پیدا کی جارہی ہے تاکہ ہر کسی کو کوویڈ کے بارے میں معلومات حاصل ہوسکیں۔کاونٹرس پر راست رابطہ اور ہجوم سے بچنے کے لئے مسافرین کو ہدایت دی گئی ہے کہ وہ اپنے سامان کی گھر پر ہی جانچ کرلیں یا پھر سیلف چیک سہولت سے استفادہ کریں۔آرٹی پی سی آر کی رپورٹ کو بین الاقوامی سفر کے لئے لازمی بنایاگیا ہے ۔حیدرآباد انٹرنیشنل ایرپورٹ نے کوویڈ کے معائنوں کے لئے سرکردہ لیبس کے ساتھ اشتراک کیا ہے ۔مسافرین امیگریشن کی سطح پر یا پھر انٹرنیشنل ڈپارچر ٹرمنلس پر معائنہ کی سہولت سے استفادہ کرسکتے ہیں۔
