وشاکھا پٹنم ۔19 ڈسمبر (سیاست ڈاٹ کام ) ہندوستان نے روہت شرما اور لوکیش راہول کی سنچریوں کی بدولت ویسٹ انڈیز کو دوسرے ون ڈے میچ میں بآسانی 107رنز سے شکست دی لیکن اس میچ میں دونوں ٹیموں کے کپتانوں نے نیا منفی ریکارڈ اپنے نام کر لیا۔ وشاکاپٹنم میں کھیلے گئے سیریز کے دوسرے ونڈے میچ میں میزبان ٹیم کے کپتان ٹیم کے عمدہ آغاز کے بعد میدان میں اترے تو امید تھی کہ وہ اپنے روایتی انداز کو برقرار رکھتے ہوئے ایک اور بڑی اننگز کھیلیں۔تاہم اسٹیڈیم میں موجود شائقین کو اس وقت شدید مایوسی ہوئی جب کپتان ویرات کوہلی پہلی گیند پر آؤٹ ہوکر گولڈن ڈک شکار ہو گئے۔ بعدازاں ویسٹ انڈین ٹیم کی اننگز میں مہمان ٹیم کے کپتان کیرن پولارڈ میدان میں اترے تو محمد سمیع نے انہیں بھی پہلی گیند پر پویلین واپسی پر مجبور کردیا۔یہ ونڈے کرکٹ کی تاریخ میں پہلا موقع تھا کہ دونوں ہی ٹیموں کے کپتان میچ میں گولڈن ڈک کا شکار ہوئے اور اس سے قبل آج تک کسی بھی میچ میں ایسا نہیں ہوا تھا۔ کوہلی ونڈے کیریئر میں تیسری مرتبہ گولڈن ڈک پر آؤٹ ہوئے جہاں وہ پہلی مرتبہ 2011 میں ویسٹ انڈیز ہی کے خلاف پہلی مرتبہ اس خفت سے دوچار ہوئے تھے اور پھر آج سے چھ سال قبل انگلینڈ کے خلاف میچ میں بھی وہ کھاتا کھولے بغیر ہی پہلی ہی گیند پر رخصت ہو گئے تھے۔
