کراچی ۔ 5 ڈسمبر (سیاست ڈاٹ کام) پاکستانی کرکٹ ٹیم کے سابق آل راونڈر عبدالرزاق نے کہا ہیکہ ویراٹ کوہلی کے مظاہروں میں ناقابل یقین استقلال ضرور ہے لیکن وہ لیجنڈری بیٹسمین سچن تنڈولکر کے زمرہ کے کھلاڑی نہیں ہے۔ عبدالرزاق محسوس کرتے ہیں کہ عالمی سطح پر کرکٹ کا معیار گرا ہے ۔ عبدالرزاق نے کہا کہ 1992ء تا 2007ء کے درمیان جس طرح کی کرکٹ کھیلی جاتی تھی اس وقت جیسے عالمی کھلاڑی اب موجود نہیں ہیں جبکہ2007ء کے بعد جب سے ٹوئنٹی 20 کرکٹ کا آغاز ہوا ہے کرکٹ تبدیل ہوچکی ہے۔ بولنگ ،بیٹنگ اور فیلڈنگ میں ماضی کی طرح گہرائی نہیں ہے۔ انہوں نے مزید کہا کہ کوہلی کو دیکھئے وہ جس طرح کا اسکور کررہے ہیں اس میں استقلال ضرور ہے لیکن میں انہیں سچن تنڈولکر کے ہم پلہ یا اس معیار کے کھلاڑی تصور نہیں کرتا ۔ رزاق جنہوں نے پاکستان کیلئے 46 ٹسٹ ، 265 ونڈے اور 32 ٹوئنٹی 20 مقابلے کھیلے ہیں۔ انہوں نے کہا کہ ماضی کی طرح اس وقت عالمی معیار کے بولرس بھی موجود نہیں ہیں اور نیٹ میں سینئر کھلاڑیوں کو آوٹ کرنے کی بنیاد پر انہیں ٹیم میں منتخب کیا جانا مضحکہ خیز ہے۔ رزاق کے بموجب پاکستانی ٹیم کی آسٹریلیا میں شکست کی ایک اہم وجہ نوجوان بولروں کا ناکام ہونا ہے۔ نسیم شاہ اور حسنین باصلاحیت بولرس ضرور ہیں لیکن اتنا جلد انہیں ٹسٹ کرکٹ کھلانا جلدبازی ہے۔
