نئی دہلی ۔11 ڈسمبر (سیاست ڈاٹ کام) ہندوستانی کرکٹ ٹیم کے کپتان وراٹ کوہلی کا شماردنیا کے سب سے فٹ کھلاڑیوں میں ہوتا ہے۔ ہرکوئی ان سے ترغیب لیتا ہے اوران کی فٹنس کا رازجاننا چاہتا ہے۔ یہاں تک کہ ہندوستانی ٹیم کے دیگرکھلاڑی بھی فٹنس کے لئے کوہلی کے بتائے ہوئے راستے پر چلتے ہیں۔ حالانکہ کبھی کوہلی نے خود اس بارے میں نہیں بتایا کہ فٹنس کیلئے اتنا جنون کیسے پیدا ہوا، لیکن اب ٹیم کے سابق ٹرینرشنکرباسونے اس بات کا انکشاف کردیا ہے۔ کرکٹ کی دنیا میں ایسے وقت میں جب پوری دنیا کے کھلاڑی ورک لوڈ منیجمنٹ کودرست کرنے میں لگے ہیں، 31 سالہ کوہلی بغیرکسی پریشانی کے تینوں فارمیٹ میں مسلسل کرکٹ کھیل رہے ہیں۔ سابق ٹرینر شنکرباسونے انکشاف کیا ہیکہ کوہلی کواسکواش کھلاڑی دیپکا پلیکل سے فٹ رہنے کی ترغیب ملی۔ پلیکل نے ہی کوہلی کوفٹنس حاصل کرنے کے لئے اورسخت محنت کرنے کیلئے ترغیب دی۔ رپورٹ کے مطابق ہندوستانی ٹیم کے سابق ٹرینرشنکرباسونے کہا ابتدائی دوتین سال ہم آئی پی ایل کے دوران گرمیوں میں ہی ٹریننگ کرتے تھے۔ اس کے بعد جب کوہلی نے دیپکا پلیکل کوٹریننگ دیتے ہوئے دیکھا تووہ ان سے کافی متاثرہوئے۔ وہ انفرادی کھیل میں فٹنس کی سطح کودیکھ کرحیران تھے۔ انہوں نے کہا کہ ہم ایسی ٹریننگ کیوں نہیں کر سکتے؟ شنکرباسومانتے ہیں کہ اب بھی کافی بہترکی گنجائش ہے۔وراٹ کوہلی وارم اپ کے دوران بھی کئی طرح کی ایکسرسائز کرتے ہیں۔فٹنس کے لئے کوہلی کا جنون ہی ہے جس کی وجہ سے انہوں نے ٹیم میں یویوٹسٹ کولازمی کرنے میں اہم تعاون کیا۔ یویوٹسٹ میں ناکام ہونے پرکھلاڑی کوٹیم میں اپنی جگہ گنوانی پڑسکتی ہے۔
