پونے ۔ 9اکٹوبر (سیاست ڈاٹ کام ) ویراٹ کوہلی کے ہمشکل سوربھ گیڈے ان دنوں سرخیوں میں ہیں جو پونے میں رہتے ہیں۔ ہندوستان اور جنوبی افریقہ کے خلاف تین میچوں کی سیریز کا دوسرا ٹسٹ بھی پونے میں ہی 10 اکتوبر سے کھیلا جانا ہے۔ رپورٹ کے مطابق سوربھ گیڈے پیشے سے جے سی بی کپمنی میں جونیئر انجینئر ہیں۔ کوہلی کی طرح نظر آنے والے سوربھ کی زندگی اس سال مئی میں بالکل بدل گئی جب ایک مقامی ایم ایل اے نے انہیں دیکھا اور انتخابی ریلی میں آنے کیلئے راضی کرلیا۔ دراصل مہاراشٹر میں واقع شرور ضلع میں رام لنگ گرام پنچایت کا سرپنچ بننے کے خواہاں امیدوان نے ووٹروں کو کہہ کر لبھایا کہ ویراٹ وہلی ان کیلئے انتخابی تشہیر کریں گے۔ اس کیلئے باقاعدہ ہورڈنگ لگائے گئے۔ پورا ڈھنڈورا پیٹا گیا کہ 25 مئی کی ریلی میں ہندستانی کپتان کوہلی پہنچیں گے۔ پھر کیا تھا کوہلی کے ساتھ سیلفی اور فوٹو لینے والوں کی بھیڑ جمع ہوگئی لیکن کوہلی کو نہیں آنا تھا تو نہیں آئے۔ ان کی جگہ سوربھ گیڈے پہنچے جنہوں نے کوہلی کی طرح داڑھی بنا رکھی تھی اور چشمہ لگا رکھا تھا۔ سوربھ اس سے پہلے کی کہانی بھی بتاتے ہیں۔ انہوں نے کہا میرے دوست اور ساتھی مجھ سے کہتے تھے کہ میں کوہلی جیسا نظر آتا ہوں۔ میرے ایک دوست نے میری تصویر بھی لی تھی جسے کسی طرح شرور کے ایم ایل اے نے بھی دیکھ لیا۔ انہوں نے مجھے فون کیا اور سرپنچ ریلی میں تشہیر کرنے کیلئے کہا۔ مجھے احساس نہیں تھا کہ اس ریلی کے بعد اتنا مشہور ہوجاؤں گا۔ سوربھ کا گاؤں یے لاوڑی دیہو پونے سے 25 کلو میٹر کی دوری پر ہے۔ انہیں دیہو کا کوہلی کہا جاتا ہے۔
