کویت سٹی : کورونا وبا کے باعث معطل ہونے والا فضائی آپریشن بحال کردیا گیا ہے جس کے تحت پاکستان ۔ہندوستان اور مصر کیلئے پروازوں کا آغاز کردیا گیا ہے۔عرب ٹی وی کے مطابق پاکستان ہندوستان اور مصر کے ساتھ آپریشن کا آغاز جبکہ بنگلہ دیش، نیپال اور سری لنکا کے ساتھ پروازیں شیڈولنگ کی منتظر ہیں۔ کویت بین الاقوامی ہوائی اڈے نے وبائی بحران کے باعث ڈیڑھ سال کے وقفے کے بعد پاکستان، ہندوستان اور مصر کے ساتھ پروازیں دوبارہ شروع کیں۔ڈی جی سی اے نے بتایا کہ سری لنکا ، نیپال اور بنگلہ دیش سے براہ راست پروازوں کے شیڈول آپریشن کا عمل جاری ہے۔دریں اثنا کویت ایئرویز نے اپنے ٹویٹر اکانٹ پر صارفین کو مطلع کرتے ہوئے اعلان کیا کہ کویت ایئرویز پاکستان کے لئے ہفتے میں تین براہ راست پروازیں چلائے گا جو کہ ہفتہ میں دو پروازیں اسلام آباد جبکہ ایک پرواز لاہور کے لئے ہو گی دوسری جانب گذشتہ روز جزیرہ ایئر ویز کی ایک پرواز کوچی (ہندوستان)سے جبکہ ممبئی سے کویت ایئر ویز کی 5 پروازیں کویت پہنچیں۔ڈائریکٹوریٹ جنرل آف سول ایوی ایشن کے ڈائریکٹر آپریشنز منصور الہاشمی نے بتایا کہ وزرا کونسل کے فیصلے پر عمل درآمد نے کویت اور ہندوستان کے درمیان براہ راست پروازوں کی آمد اور روانگی کا مشاہدہ کیا۔
