کویت سٹی: کویت کے شہر المنقف میں ایک رہائشی عمارت میں آتشزدگی کے واقعہ میں کم از کم 49 افراد ہلاک ہوگئے۔ یہ واقعہ مقامی وقت کے مطابق صبح 6 بجے کے قریب پیش آیا۔ کویتی وزارت صحت کا کہنا ہے کہ آگ لگنے کی وجہ سے تقریباً 43 افراد کو ہاسپٹل میں داخل کرایا گیا۔ ایک اطلاع کے مطابق مرنے والوں میں ہندوستانی شہری بھی شامل ہیں جبکہ ایک اور اطلاع میں بتایا گیا کہ متاثرین میں زیادہ تر ہندوستانی شہری ہوسکتے ہیں۔وزیر خارجہ ایس جے شنکر نے ٹوئٹ کیا کہ کویت کے شہر میں آتشزدگی کے واقعہ کی خبر سے گہرا صدمہ ہوا ہے۔ مبینہ طور پر 40 سے زیادہ اموات ہوئی ہیں اور 50 سے زیادہ ہاسپٹل میں داخل ہیں۔ ہمارے سفیر کیمپ کئے ہوئے ہیں اور مزید معلومات کا انتظار ہیں۔اس سلسلہ میں کویت میں ہندوستانی سفارت خانے نے ایک ہیلپ لائن نمبر جاری کیا ہے اور کہا ہے کہ آگ کے حادثے میں کچھ ہندوستانی شہری بھی شامل ہوسکتے ہیں۔ سفارت خانہ ہر ممکن مدد فراہم کرنے کیلئے تیار ہے۔کویت میں ہندوستانی سفیر نے کہا کہ آج کے آتشزدگی کے واقعہ میں زخمی ہونے والے 30 ہندوستانی کارکنوں کو دواخانے میں داخل کیا گیا ہے۔میڈیا رپورٹس میں بتایا گیا کہ متاثرہ عمارت میں ایک ہی کمپنی کے 160 ملازمین رہائش پذیر تھے، جن میں سے متعدد کو بچا لیا گیا، جو ہاسپٹل میں زیرعلاج ہیں۔ حکام نے بتایا کہ زیادہ تر ہلاکتیں آگ کے دھویں کے باعث دم گھٹنے سے ہوئیں۔کویتی وزیرداخلہ نے عمارت کے مالک اور کمپنی کے مالک کی گرفتاری کا حکم دے دیا ہے۔انہوں نے مزید کہا کہ ہم ہمیشہ کمپنیوں کو خبردار کرتے ہیں کہ بہت زیادہ ورکرز کو ایک جگہ نہ رکھا جائے۔انہوں نے کمپنی کا نام، ہلاک ورکرز کی قومیت اور دیگر تفصیلات جاری نہیں کیں۔ عمارت میں آگ لگنے کی وجہ ابھی معلوم نہیں ہوسکی ہے ۔
