کویت سٹی ۔ کویتی حکومت نے 2 جنوری کو اپنی تمام سرحدیں جزوی طور پرکھولنے کا فیصلہ کیا ہے۔کویتی نیوز ایجنسی (کونا) کے مطابق وزیر اعظم شیخ صباح خالد الحمد الصباح کی صدارت میں منعقدہ کابینہ اجلاس میں سرحدیں کھولنے کا فیصلہ ہوا ہے۔کابینہ نے کہا ہے کہ کورونا وائرس کی نئی شکل کے باعث سرحدیں بندکرنے کا فیصلہ یکم جنوری تک کیا گیا تھا۔اس فیصلہ میں کوئی توسیع نہیں ہوگی، تمام سرحدیں 2 جنوری کو جزوی طور پر کھل جائیں گی۔کابینہ نے کہا ہے کہ ملک کی فضائی سرحد مکمل طور پرکھول دی جائے گی- کویت انٹر نیشنل ایرپورٹ پر پروازیں بحال کی جائیں گے۔ بری اور بحری سرحدیں 2 جنوری کو صبح 9 بجے سے دوپہر3 بجے تک کھلی رہیں گی تاہم اس حوالے سے حالات کے مطابق فیصلہ ہوگا۔واضح رہے کہ کویت نے کورونا وائرس کی نئی شکل کے باعث اپنی تمام سرحدیں بند کرنے کا فیصلہ کیا تھا۔
