گندگی اور بدبو کا مستقل خاتمہ مزید دو ڈمپنگ یارڈ کے لیے بہت جلد سنگ بنیاد رکھنے کے ٹی آر کا اعلان
حیدرآباد :۔ ریاستی وزیر بلدی نظم و نسق کے ٹی آر نے آج شہر حیدرآباد میں کچرے سے پیدا ہونے والے جنوبی ہند کے پہلے برقی پلانٹ کا افتتاح کیا ۔ اس موقع پر خطاب کرتے ہوئے کے ٹی آر نے کہا کہ جواہر نگر ، دمائی گوڑہ کے عوام نے گندگی اور بدبو کی جو شکایت کی تھی اس کا مستقل حل برآمد کرنے کے لیے یہ پاور پلانٹ قائم کیا گیا ہے ۔ اس سے 19.8 میگاواٹ برقی پیدا ہوگی ۔ شہر حیدرآباد کے جواہر نگر میں جی ایچ ایم سی اور رامکی انورو انجینئرس کے اشتراک بلدی مبلہ پر برقی ( ویسٹ ٹو انرجی ) تیار کی جائے گی ۔ اس برقی پلانٹ کو عصری ٹکنالوجی کا استعمال کرتے ہوئے تعمیر کیا گیا ہے اور یہ برقی پلانٹ عوامی صحت کے لیے نقصان دہ بھی نہیں ہوگا ۔ کے ٹی آر نے کہا کہ شہر حیدرآباد میں روزانہ 5 تا 6 ہزار ٹن کچرا جمع کرتے ہوئے اس کو جواہر نگر کے ڈمپنگ یارڈ میں جمع کیا جاتا تھا ۔ اس سے مقامی عوام کے مسائل کا جائزہ لیا اور مسائل کی یکسوئی کے لیے چیف منسٹر کے سی آر نے خصوصی دلچسپی دکھائی ۔ جواہر نگر اور دمائی گوڑہ کے عوامی مسائل کا مستقل حل دریافت کرنے کے لیے چیف منسٹر کے سی آر نے ویسٹ ٹو انرجی پلانٹ قائم کرنے کی منظوری دی ۔ 19.8 میگاواٹ برقی پلانٹ کا آج افتتاح کیا گیا ہے ۔ 1200 ٹن کچرا برقی پیداواری کے لیے استعمال کیا جائے گا ۔ جواہر نگر میں پہاڑوں کے مانند تبدیل ہونے والے کچرے کو 147 کروڑ روپئے سے کیاپنگ کرتے ہوئے اس کی خوبصورتی میں اضافہ کیا جائے گا ۔ اس سے مقامی عوام کی صحت پر کوئی اثر نہیں ہوگا اور نہ ہی بدبو پھیلے گی ۔ موجودہ برقی پلانٹ کے ساتھ مزید 28 میگاواٹ برقی پلانٹ کا سنگ بنیاد رکھا گیا ہے ۔ یہ پلانٹ کی تعمیرات 18 ماہ میں مکمل ہوجائے گی ۔ فی الحال جواہر نگر ڈمپنگ یارڈ کو خوبصورت بنانے کی ضرورت ہے ۔ مزید دو مقامات ضلع سنگاریڈی کے لکٹرا رام ضلع میدک کے پیارے نگر کی اراضیات کا انتخاب کیا گیا ہے ۔ جہاں پر ڈمپنگ یارڈس قائم کئے جارہے ہیں سائنٹفیک انداز میں اس کو مکمل کیا جائے گا ۔ بہت جلد ان ڈمپنگ یارڈس کے لیے سنگ بنیاد رکھا جائے گا ۔ اس موقع پر ریاستی وزیر لیبر ملا ریڈی مئیر حیدرآباد بی رام موہن کے علاوہ دوسرے موجود تھے ۔۔
