اسلام آباد۔16 اپریل (سیاست ڈاٹ کام) پاکستان کے سابق فاسٹ بولر شعیب اختر نے سنیل گواسکرکو جواب دیتے ہوئے کہا ہے کہ گزشتہ سال لاہور میں برفباری ہوئی تھی اس لئے کچھ بھی ناممکن نہیں ہے۔ شعیب اختر نے سوشل میڈیا پر اپنے بیان میں تجویز پیش کی تھی کہ کورونا وائرس کے متاثرین کی مدد کے لیے پاکستان اور ہندوستان کے درمیان ونڈے سیریز کروائی جائے، ان مقابلوں میں دونوں ملکوں کی ہار جیت سے زیادہ انسانیت کی کامیابی ہوگی اور کسی کو شکست پر بھی افسوس نہیں ہوگا۔شعیب اختر کی تجویز کو ہندوستانی کرکٹرز نے یکسر مسترد کردیا اور پر تنقید کرتے ہوئے سابق کپتان کپل دیو نے کہا کہ ہندوستان کو پیسوں کی ضرورت نہیں، کرکٹرز کی جان کو خطرے میں ڈالنے والا کوئی کام ممکن نہیں، سابق کپتان سنیل گواسکر نے بھی طنز کرتے ہوئے کہا کہ لاہور میں برف باری تو ہوسکتی ہے لیکن ہندوستان اور پاکستان کی سیریز کے امکانات نہیں، دونوں ممالک کی ٹیمیں ورلڈ کپ اور آئی سی سی کے ٹورنمنٹس میں ہی آمنے سامنے ہوں گی۔ سنیل گواسکر کے جواب میں راولپنڈی ایکسپریس شعیب اختر نے بھی سوشل میڈیا پر بھرپور جوابی طنز کیا اور انہوں نے ایک تصویر شائع کرتے ہوئے لکھا کہ گزشتہ سال لاہور میں برفباری ہوئی تھی، اس لئے کچھ بھی ناممکن نہیں ہے۔
