ریاض۔24 نومبر(ایجنسیز) یہاں سعود عرب کے دارالحکومت میں چھٹی بین الاقوامی کھجور کانفرنس اور نمائش ورلڈ آف ڈیٹس کا آغاز ہورہا ہے، جس میں وزیرِ ماحولیات، پانی و زراعت عبدالرحمن الفضلی شرکت کریں گے۔ یہ ایونٹ نیشنل سینٹر فار پامز اینڈ ڈیٹس کی جانب سے 25 نومبر تا 4 دسمبرکنگ سعود یونیورسٹی میں منعقد کیا جا رہا ہے، جس میں ملکی و غیر ملکی ماہرین اور نمائش کنندگان شریک ہوں گے۔ اس سال کانفرنس کا سائنسی شراکت دارکنگ عبداللہ یونیورسٹی آف سائنس اینڈ ٹیکنالوجی ہے، اور تھیم رکھا گیا ہے’’سرمایہ کاری اور اختراع کھجور کے شعبے کے نئے افق دریافت کرنا۔ سعودی پریس ایجنسی کے مطابق، کانفرنس کا مقصد کھجور کے شعبے کے کردار کو پائیداری اور فوڈ سیکیورٹی میں اجاگرکرنا ہے۔ اس دوران پینل مباحثے اور سائنسی سیشنز میں شعبے کی جدت، تحقیقی کام، نئے منصوبے اور سرکلر اکانومی ماڈلز پر گفتگو ہوگی۔ کانفرنس میں کھجورکے درختوں کو لاحق بیماریوں اور کیڑوں سے متعلق چیلنجز، اسمارٹ فارمنگ ٹیکنالوجیزاورکٹائی کے بعد کی جدید مشینی عمل پر بھی بات ہوگی تاکہ پیداوار اور معیار بہتر بنایا جا سکے۔ ایونٹ شام 4 بجے سے رات 11 بجے تک عوام کے لیے مفت کھلا ہوگا۔ اس میں مختلف سعودی علاقوں کے پویلین بھی ہوں گے، جہاں ہر خطے کی نمایاں کھجور کی اقسام اور ثقافتی شناخت پیش کی جائے گی۔ نمائش کے ایک حصے میں کمپنیوں، کاشتکاروں اورکاروباری افراد کے لیے پروسیسڈ ڈیٹ مصنوعات کی نمائش کا انتظام کیا گیا ہے، جبکہ مقامی اور بین الاقوامی شیفس کی نگرانی میں لائیو کوکنگ اور ٹسٹنگ زون بھی شامل ہوگا۔ اس کے علاوہ ریستوراں و کیفے ایریا، کھجور سے متعلق دستکاریوں کا زون، اور پام ہیریٹیج میوزیم بھی ایونٹ کا حصہ ہوگا، جہاں کھجورکی کاشت اور صنعت کی تاریخی ترقی کو دکھایا جائے گا۔ سال 2024 میں سعودی عرب دنیا کا سب سے بڑاکھجور برآمد کنندہ رہا، برآمدات 1.695 بلین سعودی ریال تک پہنچ گئیں اور پیداوار 19 لاکھ ٹن سے زائد رہی۔ سعودی کھجوریں133 ممالک تک برآمد کی گئیں اور عالمی مارکیٹ میں نمایاں کامیابی حاصل کی۔
