ڈھاکہ : 28 مئی (ایجنسیز)۔ کرکٹ کی دنیا میں ایک چونکا دینے والا واقعہ دیکھنے میں آیا ہے۔ کرکٹ کے میدان میں عام طور پرکھلاڑیوں کے درمیان گرما گرم بحث دیکھی جاتی ہے۔ بعض اوقات یہ بحث کافی گرم ہو جاتی ہے۔ لیکن ایسا ہی ایک واقعہ بنگلہ دیش میں پیش آیا جس میں دو کھلاڑیوں کے درمیان دھکے مارنے کا واقعہ پیش آیا اور اس سے ہاتھا پائی تک ہوگئی۔ یہ دیکھ کر امپائر نے مداخلت کی۔ یہ واقعہ اب خاصی توجہ حاصل کررہا ہے۔ درحقیقت یہ واقعہ ڈھاکہ کے شیر بنگلہ نیشنل اسٹیڈیم میں جنوبی افریقہ ایمرجنگ اور بنگلہ دیش ایمرجنگ کے درمیان کھیلے جارہے دوسرے غیر سرکاری ٹسٹ میچ کے دوران پیش آیا۔ کھیل کے دوسرے روز جنوبی افریقی کھلاڑی شیپو اینٹولی اور بنگلہ دیش کے رپن منڈل کے درمیان گرما گرم بحث ہوئی، دونوں کھلاڑی ایک دوسرے کو دھکے دیتے نظر آئے۔ بات ہاتھا پائی تک بڑھ گئی اور بنگلہ دیش کے رپن منڈل نے بیٹ سے مارنے کی کوشش بھی کی جس کے بعد امپائر نے مداخلت کی۔اس میچ میں بنگلہ دیش ایمرجنگ نے ٹاس جیت کر پہلے بیٹنگ کا فیصلہ کیا اور یہ واقعہ بنگلہ دیش کی بیٹنگ کے دوران پیش آیا۔ اگرچہ اس واقعے کی اصل وجہ واضح نہیں ہے لیکن خیال کیا جا رہا ہے کہ یہ میدان میں گرمی کا نتیجہ تھا۔ دونوں کھلاڑیوں کے درمیان تلخ کلامی اس حد تک بڑھ گئی کہ اگر امپائر مداخلت نہ کرتا تو بڑا حادثہ رونما ہو سکتا تھا۔ دونوں ٹیموں کے درمیان اس دورے کا آغاز 3 ونڈے میچوں سے ہوا، جہاں بنگلہ دیش نے 2-1 سے کامیابی حاصل کی۔ اور اب، غیر سرکاری ٹسٹ کھیلے جا رہے ہیں۔ میچ عہدیداروں نے ابھی تک کوئی فوری کارروائی نہیں کی ہے پروٹوکول کے مطابق آن فیلڈ امپائرزکو کسی بھی سزا کا اعلان کرنے سے پہلے باضابطہ رپورٹ پیش کرنا ہوگا۔ رپورٹ کے مطابق، میچ ریفری واقعے کی اطلاع بی سی بی اورسی ایس اے دونوں کو دیں گے، جن سے کارروائی کی توقع ہے۔اس میچ کے دوران ہونے والا یہ واقعہ اس وقت سوشل میڈیا پر موضوع بحث بنا ہوا اور اس کا ایک ویڈیو کافی وائرل ہورہا ہے ۔
