نئی دہلی: 6 اگست (ایجنسیز) ملک میں ایک عرصے سے یہ افواہیں گردش کر رہی تھیں کہ عام بخار، سردرد اور بدن درد میں استعمال ہونے والی مقبول دوا پیراسیٹامول پر ممکنہ طور پر پابندی لگنے والی ہے۔ سوشل میڈیا پر اس حوالے سے متعدد دعوے کیے جا رہے تھے، جس نے عام عوام میں بے چینی پیدا کر دی۔ اس معاملے پر منگل کو پارلیمنٹ میں مانسون اجلاس کے دوران سوال اٹھایا گیا، جس پر حکومت نے باضابطہ جواب پیش کیا۔ مرکزی وزیر مملکت برائے کیمیکل و فرٹیلائزر انوپریا پٹیل نے ایک تحریری بیان میں بتایا کہ وزارت صحت و خاندانی بہبود نے واضح کیا ہے کہ مرکزی دوا جاتی معیارات کنٹرول تنظیم (سی ڈی ایس سی او) کو پیراسیٹامول پر پابندی سے متعلق کوئی اطلاع موصول نہیں ہوئی ہے۔تاہم وزیر نے یہ بھی بتایا کہ ملک میں کچھ ایسے فکسڈ ڈوز کمبینیشنز پر پابندی عائد کی گئی ہے جن میں پیراسیٹامول کو دیگر دوائوں کے ساتھ شامل کیا گیا تھا۔ ان مرکب دواؤں پر سائنسی بنیادوں پر نظرثانی کے بعد یہ قدم اٹھایا گیا تاکہ عوامی صحت کو ممکنہ نقصان سے بچایا جا سکے۔ مگر خالص پیراسیٹامول یا اس کی عام دستیاب شکلوں پر ایسی کوئی روک نہیں لگائی گئی۔
ڈاکٹر ازہری کی چیف منسٹر کرناٹک سے ملاقات
کالی کٹ بنگلور:6 اگست (ایجنسیز) معروف عالم دین مرکز الثقافۃ السنیہ کے سرپرست اور نالج سٹی کے منیجنگ ڈائیریکٹر ڈاکٹر محمد عبدالحکیم الازہری نے ریاست کرناٹک کے حالیہ دورہ کے دوران وزیر اعلیٰ سدرامیاں کے ساتھ ایک خصوصی نششت کی۔اس موقع پر ڈاکٹر ازہری نے شہری ترقی،اقلیتی فلاح وبہبودکی جامع اور پائیدار ترقی کے حصول میں تعلیم اور کمیونیٹی کو باختیار بنانے جیسے کئی اہم مسائل پر توجہ مرکوز کرائی۔میٹنگ کے دوران ڈاکٹر ازہری نے وزیر اعلیٰ کو مرکز نالج سٹی کیرالا کا دورہ کرنے کی دعوت پیش کی۔جوکہ مرکز الثقافۃ السنیہ کے ذریعہ قائم کردہ ایک عظیم تعلیمی وثقافتی مرکز ہے۔جو علم پر مبنی ترقی اور سماجی اصلاح میں سنگ میل کی حیثیت رکھتا ہے۔
اس موقع پر ڈاکٹر عبدالحکیم ازہری نے وزیر اعلیٰ کے علاوہ متعدد اہم شخصیات سے ملاقات کی۔جن میں جناب ضمیر احمد خان (وزیر برائے وقف اقلیتی بہبود) جناب رحیم خان (وزیر برائے میونسپل ایڈ منسٹریشن)جناب نذیر احمد صاحب (ممبر قانون ساز کونسل) کے اسماء شامل ہیں۔ڈاکٹرازہری نے سبھی لیڈرا ن کو مرکز نالج سٹی کے وزٹ کی دعوت پیش کی۔تاکہ مرکز کیمپس کی جامع تعلیم اور بین المذاہب ہم آہنگی اور کمیونیٹی کی بہتری کیلئے مختلف اقدامات وامور کا خود جازہ لیں۔واضح رہے کہ یہ اعلیٰ سطحی بات چیت تمام خطوں میں مساوی ترقی کو فروغ دینے کے لئے حکومتی اور شہری رہنماؤں کے ساتھ بامعنی شراکت داری کو فروغ دینے کے لئے مرکز کے عزائم ومنصوبے کی عکاسی کرتا ہے۔