ترواننتپورم، 2 ستمبر (یو این آئی) کیرالا کے بلدیاتی انتخاباتمیں ابھی چند ہفتے باقی ہیں، ریاستی الیکشن کمیشن نے ریاست بھر میں بلا رکاوٹ اور محفوظ ووٹنگ کے عمل کو یقینی بناتے ہوئے 1,37,922 بیلٹ یونٹس اور 50,693 کنٹرول یونٹس کی تیاریاں مکمل کر لی ہیں۔الیکٹرانک ووٹنگ مشینوں کوایک ماہ طویل اورسخت فرسٹ لیول چیکنگ (ایف ایل سی) ، ان کی تصدیق اور پیکنگ کے بعد ضلع کے اسٹرانگ رومز میں محفوظ طریقے سے رکھا گیا ہے ۔ایس ای سی کے افسران اور حیدرآباد میں ای وی ایم مشینیں تیار کرنے والی الیکٹرانکس کارپوریشن آف انڈیا لمیٹڈ (ای سی آئی ایل) کے انجینئروں کے ذریعہ مشترکہ طور پر ان کا معائنہ کیا گیا ہے ۔پہلے مرحلے کی جانچ جو 25 جولائی کو شروع ہوئی تھی، 14 اضلاع کے 21 مراکز میں کی گئی۔ 29 ای سی آئی ایل انجینئرز کی رہنمائی میں 1,000 سے زیادہ تربیت یافتہ اہلکاروں نے اس جانچ میں حصہ لیا، تاکہ ہر مشین کے محفوظ اور قابل بھروسہ ہونے کو یقینی بنایا جا سکے ۔اس کارروائی کوبڑے پیمانے پراور مؤثر طریقے سے انجام دینے کیلئے الیکشن کمیشن نے ‘ای وی ایم ٹریک’ سافٹ ویئرتیار کیا ہے ، جس سے انتخابی عمل کے دوران ای وی ایم مشینوں کے پورے طریقہ کار کی نگرانی کو یقینی بنایا جا سکے گا۔
