ترواننتاپورم، 13 اگست (یو این آئی) کیرالا کے صحافیوں کو اب دو لاکھ روپے کے بجائے 17 لاکھ روپے کے صحت بیمہ کا فائدہ ملے گا۔ ڈاک محکمہ کے تحت آج یہاں انڈیا پوسٹ پیمنٹس بینک (آئی پی پی بی) کے تعاون سے کیرلہ یونین آف ورکنگ جرنلسٹس (کے یو ڈبلیو جے ) کے ذریعے نافذ اس اسکیم کا ریاستی سطح پر افتتاح کیا جائے گا۔ یہ پروگرام دوپہر 12 بجے پُلی موڑ واقع کیسری میموریل ہال میں شروع ہوگا اور صحت بیمہ ٹاپ اپ اسکیم کا افتتاح کیرلہ کی بندرگاہ وزیر وی این واسوان کریں گے ۔ کے یو ڈبلیو جے کے ریاستی صدر کے پی ریجی تقریب کی صدارت کریں گے ۔ آئی پی پی بی کیرالا سرکل کے سربراہ ویوک گپتا کلیدی خطاب کریں گے ، جبکہ تریواننتا پورم ضلع برانچ مینیجر ڈی. اروِند راج اسکیم کی تفصیلات پیش کریں گے ۔ ریاست کے تمام اضلاع میں آج اور کل نام نویسی پروگرام منعقد کیے جائیں گے ۔ کے یو ڈبلیو جے کے صدر کے پی ریجی اور جنرل سیکریٹری سریش ایڈپّل نے کہا کہ ٹاپ اپ اسکیم ریاستی حکومت کے تعاون سے صحافی یونین کے ذریعہ نافذ موجودہ صحت تحفظ اسکیم کے کوریج کو بڑھا کر 17 لاکھ روپے کر دیتی ہے ۔
