ترواننت پورم، 16 جولائی (یو این آئی) کیرالا میں 675 لوگ نپاہ وائرس سے متاثرہ مریضوں کے رابطے میں آئے ہیں۔ ان میں سے 38 سب سے زیادہ خطرے کے زمرے میں اور 139 ہائی رسک کے زمرے میں ہیں۔ ریاستی وزیر صحت وینا جارج نے منگل کی شام اس کی تصدیق کی۔ انہوں نے کہا کہ ریاست کے مختلف اضلاع میں کل 675 افراد نپاہ وائرس کے متاثرین کی فہرست میں ہیں۔ محترمہ وینا جارج نے کہا کہ پلکڈ میں 347، ملاپورم میں 210، کوزیکوڈ میں 115، ایرناکلم میں دو اور تھریسور میں ایک کیس رپورٹ ہوا ہے ۔ ملاپورم میں ایک مریض فی الحال آئی سی یو میں داخل ہے اور اب تک ملاپورم سے 82 نمونوں کی جانچ کی گئی ہے ، جن کی رپورٹ منفی آئی ہے ۔ انہوں نے کہا کہ پلکڈ میں 12 افراد کو قرنطینہ میں رکھا گیا ہے جبکہ پانچ افراد کو اسپتال سے چھٹی دے دی گئی ہے ۔ ریاست بھر میں، 38 افراد سب سے زیادہ خطرے کے زمرے میں ہیں اور 139 افراد ہائی رسک کے زمرے میں ہیں اور ان کی نگرانی کی جا رہی ہے ۔ محترمہ جارج کی قیادت میں صورتحال کا جائزہ لینے کے لیے اعلیٰ سطحی میٹنگ بلائی گئی ۔
اور اس میں ایڈیشنل چیف سکریٹری، محکمہ صحت، اسٹیٹ ہیلتھ مشن کے ڈائرکٹر، ڈائرکٹر میڈیکل ایجوکیشن، ایڈیشنل ڈائرکٹر، ڈسٹرکٹ کلکٹر، ڈسٹرکٹ میڈیکل آفیسر، پولس افسران اور دیگر محکموں کے نمائندوں نے شرکت کی۔
