کیرالہ کے سلطان باتھری میں این ایچ 766(nh.766) پر رات میں ٹریفک پر لگی پابندی کے خلاف ‘ڈیموکریٹک یوتھ فیڈریشن آف انڈیا’، یوتھ کانگریس، یوتھ لِیگ کے کارکنان 10 روز سے احتجاجی مظاہرہ کر رہے ہیں، کانگریس رہنما اور کیرالہ کے وايناڈ سے ممبر پارلیمنٹ راہل گاندھی این ایچ 766 پر رات میں ٹریفک پر لگی پابندی کے خلاف نوجوانوں کے ذریعے کیے جا رہے احتجاجی مظاہرہ کی پرزور حمایت کی ہے، نوجوانوں کے احتجاجی مظاہرہ میں شامل ہونے کے لئے رکن پارلیمان راہل گاندھی سلطان باتھری پہنچے اور ان سے خیر خیریت پوچھی۔
راہل گاندھی نے اپنے آفیشل اکاونٹ سے ٹوئٹ کر کے کہا، ’’میں کیرالہ اور کرناٹک کو جوڑنے والے نیشنل ہائی وے 766 پر سفر پر لگی پابندی کی مخالفت میں بھوک ہڑتال پر بیٹھے نوجوانوں کے ساتھ یکجہتی سے کھڑے ہونے کے لئے کیرالہ کے وايناڈ میں ہوں، پہلے میں اسپتال میں ان سے جاکر ملا جو طویل بھوک ہڑتال کی وجہ سے بیمار ہو گئے ہیں ۔
احتجاج کرنے والے نوجوانوں سے ملنے کے بعد راہل گاندھی نے کہا کہ “باندی پور ریزرو سے ہوکر جانے والے نیشنل ہائی وے پر 9 گھنٹوں تک ٹریفک کرنے سے کیرالہ اور کرناٹک دونوں ریاستوں کے عوام کو پریشانی کا سامنا کرنا پڑ رہاہے۔ انہوں نے کیرالہ حکومت سے مطالبہ کیا ہے کہ اس فیصلے کو فوری طور پر واپس لیا جانا چاہیے۔ ’ڈیموکریٹک یوتھ فیڈریشن آف انڈیا’، یوتھ کانگریس اور یوتھ لِیگ کے کارکنان 10 دنوں سے ہڑتال جاری رکھے ہوئے ہیں، نوجوان اپنے مطالبے پر اڑے ہوئے ہیں،مطالبہ واپس لینے کا نام نہیں لے رہے ہیں۔ ان کا کہنا ہے کہ جب تک مطالبہ پورا نہیں کیا جاتا تب تک ہم بھوک ہڑتال ختم نہیں کریں گے۔
اس سے پہلے بھی راہل گاندھی ٹوئٹ میں مرکزی اور ریاستی حکومتوں سے ماحولیاتی تحفظ کی ذمہ داری کو اجتماعی طور پر قائم رکھتے ہوئے مقامی کمیونٹیز کے مفادات کے حفاظت کرنے کا مطالبہ کیا تھا۔