کیلی فورنیا:21 اگست (یو این آئی) امریکی ریاست کیلیفورنیا کی سینیٹ نے پاک ، امریکہ تعلقات اور ریاست کیلیفورنیا کی معیشت ، معاشرے اور ثقافت کی ترویج میں پاکستانی نژاد برادری کی خدمات کے اعتراف میں قرارداد متفقہ طور پر منظور کرلی۔قرارداد سینیٹر میلیسا ہرٹاڈو کی جانب سے متعارف کرائی گئی۔ یہ قرارداد پیش کرتے وقت سینیٹر میلیسا ہرٹاڈو نے پاکستانی لباس پہنا اور مہندی لگا کر کیلیفورنیا سینیٹ کے ایوان میں آئیں۔سینیٹر ہرٹادو کیلیفورنیا سینیٹ کی سب سے کم عمر خاتون منتخب رکن ہیں اور سینیٹ کمیٹی برائے زراعت کی چیئرمین ہیں۔ان کی پیش قرارداد پاکستان اور امریکہ کے درمیان دیرینہ اور کثیر جہتی تعلقات کو اجاگر کرتی ہے اور دنیا کی چوتھی سب سے بڑی معیشت کیلیفورنیا کی ترقی میں پاکستانی نژاد امریکیوں کے کردار کا اعتراف ہے ۔ سینیٹ میں منظور شدہ قرارداد پاکستانی، امریکیوں، خاص طور پر نوجوان نسل کی اپنی ثقافت سے وابستگی کو بھی اجاگر کرتی ہے ۔قرارداد ان شخصیات اور تنظیموں کی خدمات کو بھی سراہتی ہے جنہوں نے پاکستانی امریکی ثقافت، روایات اور کامیابیوں کو فروغ دیا ہے ۔سینیٹر میلیسا ہرٹاڈو نے قرارداد پیش کرتے ہوئے اپنے ریمارکس میں پاک امریکہ تعلقات کو اجاگر کیا اور کہا کہ امریکہ میں پاکستانی کمیونٹی کی کہانی قربانی، وقار اور استقامت سے عبارت ہے ۔سینیٹر ہرٹاڈو نے زور دیا کہ پاک امریکہ پارٹنرشپ مشترکہ اقدار، جمہوریت، انسانی وقار پر استوار ہے ۔سفیر پاکستان رضوان سعید شیخ کی سینیٹ میں موجودگی کو خوش آمدید کہتے ہوئے سینیٹر ہرٹاڈو نے پاک امریکہ تعلقات کے فروغ پر سفیر پاکستان کا شکریہ ادا کیا ۔ ریاستی سینیٹ میں بھرپور پذیرائی اور خصوصاً قرارداد پیش کرنے اور متفقہ طور پر منظور کروانے پر سفیر پاکستان رضوان سعید شیخ نے سینیٹر میلیسا اور کونسل آف پاکستان کی کاوشوں کو سراہا۔سفیر پاکستان نے اس موقع پر پاک امریکہ تعلقات اور عوامی روابط کو مزید مضبوط بنانے اپنے عزم کا اظہار کیا ۔ سفیر پاکستان نے کہا کہ کیلیفورنیا سینیٹ میں پاکستان کے 79ویں یوم آزادی پر قرارداد کی منظوری ہمارے مضبوط تعلقات کی عکاس ہے جو حکومتی سطح سے دونوں ممالک کے عوام کے درمیان پائے جاتے ہیں۔واضح رہے کہ کیلیفورنیا کو گولڈن اسٹیٹ کہا جاتا ہے جو ایک عالمی اقتصادی پاور ہاؤس اور ثقافتی تنوع کے مرکز کے طور پر ترقی کر رہی ہے ۔