ریاض : سعودی محکمہ شہری دفاع کے ترجمان کرنل محمد الحمادی نے کہا ہے کہ مملکت میں نیوکلیئر اور کیمیائی سرگرمیوں کی نگرانی اور اس حوالے سے پیش آنے والے مسائل سے نمٹنے میں ڈرونز استعمال کیے جائیں گے۔اس کی بدولت صورتحال کی تفصیلات ریکارڈ وقت میں معلوم ہوسکیں گی اور کیمیکل حادثات کی نگرانی مثالی انداز میں ممکن ہوگی۔ اخبار 24 سے گفتگو کرتے ہوئے الحمادی نے کہا کہ ڈرونز سے استفادے کا منصوبہ ہنگامی حالات اور بحرانوں سے نمٹنے کے سلسلے میں جدید تر ہے۔ الحمادی نے کہا کہ ڈرونز کیمیکل اور نیوکلیئر آلودگی کا پتہ لگا کر ریکارڈ وقت میں ساری صورتحال سے آپریشن روم کو مطلع کریں گے۔ ڈرونز کی رپورٹ پر حقائق کا جائزہ لینے کے بعد اور اسی تناظر میں مناسب حکمت عملی اختیار کی جائے گی۔
