ہملٹن: کینیڈا میں نامعلوم مسلح افراد نے پاکستانی خاندان کے مکان پر حملہ کرکے ایک نوجوان کو قتل دوسرے کو زخمی اور ان کے والد کو اغوا کرلیا۔میڈیاکے مطابق کینیڈا کے شہر ہملٹن میں ایک مکان پر مسلح افراد نے حملہ کردیا۔ حملہ آوروں نے مکان میں گھس کر فائرنگ کی جس کے نتیجے میں دو نوجوان شدید زخمی ہوگئے۔فائرنگ کی اطلاع ملنے پر پولیس جائے وقوع پر پہنچی تو 2 نوجوان زخمی حالت میں پڑے تھے جن میں سے ایک ہاسپٹل جاتے ہوئے راستے میں ہی دم توڑ گیا جبکہ دوسرے کو شدید زخمی حالت میں انتہائی نگہداشت کے وارڈ میں داخل کیا گیا ہے۔پولیس نے کہاکہ حملہ پاکستانی خاندان کے مکان پر کیا گیا۔ حملہ آور گھر کے سربراہ کو بھی اپنے ہمراہ لے گئے اور وحشیانہ تشدد پر انھیں مردہ سمجھ کر 6 گھنٹے بعد دریا کنارے پھینک گئے۔ گھر کے زخمی سربراہ کی شناخت فقیرعلی کے نام سے ہوئی ہے۔فقیرعلی کو گہرے زخم آئے ہیں جو ان کی زندگی کیلئے خطرہ بن سکتے ہیں۔ پولیس نے ہلاک ہونے والے نوجوان کی شناخت ظاہر نہیں کی ہے۔
